У чарадзе восеньскіх клопатаў сяльчан рабочы рытм назіраецца на многіх участках. Сабраць усё вырашчанае — тое, у што ўкладвалася праца многіх людзей на працягу ўсяго сезона, — галоўная задача дня.

На фінішную прамую сельскагаспадарчага года выходзяць земляробы ААТ “Рассвет імя К.П.Арлоўскага”. Пераважная большасць сёлетняга ўраджаю сабрана, і можна ўжо зрабіць пэўныя “прыкідкі” наконт таго, як удалося, дзякуючы вырашчанаму і сабранаму, папоўніць грамадскую касу. На асобных палетках работы вядуцца на завяршальнай стадыі.
Заўчора, калі мы пабывалі ў сельгаставарыстве, з апошніх гектараў за Казулічамі ўбіраліся цукровыя буракі. Магутны камбайн “Холмер”, якім кіравалі механізатар Юрый Каранкевіч разам з памочнікам Юрыем Нікіфараўцом, імкліва “паглынаў” зялёныя бураковыя рады, напаўня­ю­чы бункер, умя­шчальнасцю ў 16 т, салодкімі каранямі. Яны, у сваю чаргу, па меры напаўнення на працягу ўсёй ўборкі ссыпаліся ў вялізныя гурбы-бурты. Адна за адной да іх накіроўваліся аўтамашыны, якія па дагавору наймае Слуцкі цукроварафінадны камбінат. Іх загружае з дапамогай пагрузчыка рассветаўскі механізатар Аляксей Каранкевіч, і караняплоды адпраўляюцца непасрэдна на месца перапрацоўкі, дзе потым ператвараюцца ў адзін з важнейшых айчынных прадуктаў — цукар.
Рассветаўцы не першы год займаюцца вырошчваннем гэтай, без перабольшвання, стратэгічнай культуры. Працэс гэты, як адзначыў у размове з карэспандэнтам “Кіраўца” першы намеснік дырэктара “Рассвета” Аляксандр Жылінскі, бясспрэчна, вельмі працаёмкі: трэба і глебу адпаведную падабраць, і насеннем запасціся, і пасеяць згодна тэхналагічных патрабаванняў, і правесці шэраг хімічных апрацовак ды і, урэшце, якасна ўбраць… Але, як кажуць, мэта апраўдвае сродкі: пастаўка выра­шчаных цукровых буракоў выліваецца ў канчатковым выніку ў істотны даход. Да таго ж, гэта яшчэ і карысная кармавая культура. Так што, выгада ад салодкіх каранёў — відавочная. Асабліва, калі ўдалося вырасціць важкі ўраджай. А ён у “Рассвеце” сёлета менавіта такі: з 261 га накапана больш за 6 тыс. т караняплодаў. Сярэдняя ўраджайнасць на ўчастках складала па 500-550 ц на круг.
Ужо поўнасцю вызвалены палі ад цыбулі, морк­вы і сталовых буракоў. З 45 га, адведзеных пад цыбулю, накапана 2118 т
залацістых галовак пры сярэдняй ураджайнасці 470 ц/га. Морква займала 13 га, з іх атрымалі 1035 т
аранжавых караняплодаў. Назапашана таксама
940 т сталовых буракоў з 17 га, адведзеных пад іх. На круг выйшла па 552 ц.
Пазаўчора прыступілі рассветаўцы да ўборкі “каралевы агародніны” — так іншы раз называюць капусту. Як адзначыў аграном-агароднінавод Іван Фядотаў, які адказвае за вырошчванне культуры, ужо першы дзень уборкі белакачаннай паказаў, што ўраджай чакаецца неблагі: цвёрдыя і важкія качаны выдаліся адзін у адзін.
Уся атрыманая агародніна паступае ў сховішчы сельгаставарыства і чакае адпраўкі ў гандлёвыя кропкі — як уласныя, так і іншыя. Першыя партыі ўжо праходзяць перапрацоўку і пакуюцца ў спецыяльную тару. Спажыўцы гатовы набыць свежую рассветаўскую прадукцыю.
А вось ад бульбы сёлета ў гаспадарцы чакалі лепшага, чым атрымалася. Тыя значныя аб’ёмы летніх і восеньскіх ападкаў, якія пайшлі на карысць астатняй агародніне, не вельмі паспрыялі клубням. Да таго ж, не лепшым чынам паўплывала даволі позняя і халодная вясна. У выніку з 245 га накапана 6600 т
клубняў — гэта менш, чым летась. Адпаведна і ўраджайнасць меншая выйшла: 260 ц на круг. Убралі “другі хлеб”, як і мае быць — своечасова і без збояў. Задзейнічана было 5 камбайнаў, на якіх працавалі Юрый Бяляўскі, Валерый Юркавец, Іван Бяляўскі, Сяргей Фамін і Аляксандр Іваніцкі. Дастаўлялася бульба да сховішча з дапамогай механізаванага атрада.
Поўным ходам працягваецца ў “Рассвеце” работа з яшчэ адной “каралевай”. Кукуруза раскінулася ажно на 3262 га
мясцовых абшараў, 750 з якіх адведзена пад абмалот на зерне. І калі на апошнія мэты яшчэ прадстаіць уключыцца ў работу, то для нарыхтоўкі сіласу “каралеву палёў” убіраюць актыўнымі тэмпамі: больш за палову вырашчанага ўжо скошана і здробнена. Шчыруюць на гэтым участку Канстанцін Пятруша, Міхаіл Вербенка, Віталь Кашкоў і Ігар Жалдак. Хутка адвозяць масу да месцаў закладкі Мікалай Белакурскі, Сяргей Кахновіч, Мікалай Бандарэнка і іншыя — усяго задзейнічана 12 адзінак тэхнікі.
Кукуруза выдалася сёлета на славу. Для таго, каб яна налілася і набрала сіл у поўнай меры, як і заўсёды, агранамічнай службай сельгаставарыства быў праведзены цэлы комплекс неабходных тэхналагічных падыходаў. Адсюль адпаведна і выдатная зялёная маса, якую сіласуюць на жывёлагадоўчых аб’ектах. На бягучы момант назапашана больш за 57 120 т ці 72% ад запланаванага.
Не ў баку рассветаўцы і ад закладкі будучага ўраджаю. Ужо завершана сяўба азімай зерневай групы: пасевы занялі 2268 га. Яшчэ засталося пасеяць 332 га на зялёны корм. Распачалі таксама ўздым зябліва: узарана 295 га. Аб’ёмы па зябліве значныя: пад будучую сяўбу патрэбна ўзняць глебу на 3818 га. У гаспадарцы плануюць усе работы, у тым ліку і гэтую, завяршыць у аптымальныя тэрміны.

Аляксандр ХАХЛОЎ.

Фота аўтара.