У гэты дзень у 1924 годзе ўрад БССР падпісаў пастанову аб арганізацыі ўласнай кінавытворчасці. Так пачалася гісторыя нашай нацыянальнай кінастудыі – “Беларусьфільм”, якая стала за мінулыя дзесяцігоддзі не проста фабрыкай карцін, а захавальнікам памяці, гістарычнай праўды, нацыянальнай культуры.

“Беларусьфільмам” створана багатая спадчына: звыш 328 мастацкіх, 173 тэлевізійных, каля 1420 дакументальных і 233 анімацыйных фільмаў. Многія з іх увайшлі ў Залаты фонд айчыннага і сусветнага кіно – ад сямейных казак Леаніда Нячаева “Прыгоды Бураціны” і “Пра Чырвоны Капялюш” да глыбока лірычных і трывожных работ Віктара Турава “Я родам з дзяцінства”, “Вайна пад дахамі”, “Людзі на балоце”, ад гістарычных і драматычных карцін – “У жніўні 44-га…” Міхаіла Пташука і “Белыя Росы” Ігара Дабралюбава – да іншых фільмаў, якія ведаюць і памятаюць гледачы розных пакаленняў.
У апошнія гады студыя прайшла значную рэканструкцыю: новыя павільёны, сучаснае абсталяванне, шырокі выбар здымачнай тэхнікі – і ўсё гэта дае нашым рэжысёрам і аператарам магчымасць працаваць на ўзроўні, які не саступае міжнародным стандартам. Мадэрнізацыя матэрыяльна‑тэхнічнай базы – гэта інвестыцыя ў будучыню, у тое, каб беларускае кіно гаварыла на мове, зразумелай сучаснаму гледачу.
Сёлета на экраны выйшаў шэраг яркіх кінакарцін. Літаральна ў лістападзе беларускія гледачы пазнаёміліся з моцнай спартыўнай драмай “Пераломны момант” пра маладога весляра Арцёма, чый шлях ад трыумфу да падзення і зноў да праверкі характару – гэта фільм пра кошт перамогі, пра здраду і сапраўднае сяброўства.
У верасні беларускія кінематаграфісты прадставілі гледачам карціну “Класная” – фільм пра маладую настаўніцу, якой даверылі складаны 11-ы клас у аграгарадку. Гэта кіно аб сумненнях і прафесійным сталенні, аб тым, як незаменная чалавечая чуласць можа перавярнуць лёсы рабят. Фільм ужо атрымаў прызнанне – спецыяльны дыплом за “Лепшы дзіцячы акцёрскі ансамбль” на фестывалі “Кінаперамена” і “Прыз сімпатый гледачоў” IX Рэспубліканскага фестывалю беларускіх фільмаў.
У красавіку выйшаў дакументальны фільм “Лагеры смерці, Спаленыя вёскі”. Абодва фільмы па 39 хвілін – моцнай, цяжкай праўды аб дзясятках беларускіх пасёлкаў, знішчаных у гады Вялікай Айчыннай вайны, генацыдзе. Рэжысёры сабралі ўнікальныя сведчанні відавочцаў, архіўныя кадры і дакументы, каб аднавіць карціну тых трагічных падзей. Гэтыя карціны – напамін аб кошце міру і аб неабходнасці захоўваць гістарычную праўду.
Другая прэм’ера красавіка – фільм “Наш космас”, прысвечаны ўкладу беларускіх вучоных, інжынераў і касманаўтаў у асваенне касмічнай прасторы.
Студыя “Беларусьфільм” працуе на памяць і на будучыню: яна захоўвае архівы, дапамагае вырасціць новыя таленты і стварае платформу для рэжысёраў, акцёраў і тэхнічных спецыялістаў. Ганарыцца ёсць чым.
Нашы фільмы – гэта люстэрка жыцця краіны, яе гісторыі і маральных арыенціраў.
Прыходзьце ў кінатэатры і на паказы “Беларусьфільма”: на экране нараджаецца наша агульная памяць і наш гонар.
Падрыхтавала Яўгенія БЯЛЬКО.