Рэспубліканскі семінар “Аб рабоце сродкаў масавай інфармацыі па рэалізацыі задач дзяржаўнай палітыкі” прайшоў у Гродзенскай вобласці 5 жніўня. У ім прынялі ўдзел міністр інфармацыі Рэспублікі Беларусь Лілія Ананіч, кіраўнікі і прадстаўнікі органаў дзяржаўнага кіравання, рэспубліканскіх і рэгіянальных СМІ.
Магілёўскую вобласць прадстаўляла група на чале з намеснікам начальніка галоўнага ўпраўлення ідэалагічнай работы, культуры і па справах моладзі аблвыканкама Аленай Дзіваковай.
У ходзе семінара былі разгледжаны актуальныя пытанні работы сродкаў масавай інфармацыі, стварэння нацыянальнага кантэнта, узаемадзеяння з дзяржорганамі, асвятлення сацыяльна-эканамічных пытанняў развіцця краіны, удасканалення работы ў інтэрнэце.

Плянарнае пасяджэнне, якое адбылося ў Гродзенскім аблвыканкаме, адкрыла міністр інфармацыі Лілія Ананіч. Яна адзначыла маштабнасць пераўтварэнняў, якія адбываюцца ў краіне, падкрэсліла, што праграма пяцігадовага развіцця Беларусі нацэлена на плённую работу па паляпшэнні якасці жыцця кожнага чалавека, і важна, каб гэтыя задачы трансфармаваліся на старонках газет, па радыё, тэлебачанні. “Інфармацыйнае асяроддзе развіваецца дынамічна, крочыць у нагу з часам і нават у чымсьці апярэджвае падзеі. Пры гэтым у цэнтры ўвагі прэсы заўсёды павінны заставацца важнейшыя сацыяльныя праблемы, сацыяльна-эканамічныя пераўтварэнні, СМІ забяспечваюць эфектыўнае растлумачэнне новаўвядзенняў”, — адзначыла міністр.
Але, як заўважыла Лілія Ананіч, якасная работа СМІ мае на ўвазе не толькі інфармаванне, растлумачэнне, расказ аб станоўчым вопыце: прэса павінна бачыць вострыя тэмы і разам з уладай разбірацца ў іх. “Размова ідзе не аб крытыканстве, а аб поўным, усебаковым разглядзе праблемы з мэтай дапамагчы знайсці шляхі вырашэння”, — падкрэсліла яна.
Міністр таксама выказала думку, што беларускае медыйнае поле трэба пашыраць нацыянальным кантэнтам. У прыватнасці, варта надаваць увагу беларускай гісторыі, сацыяльным дасягненням дзяржавы, даносіць кожнаму думку, што “толькі мы самі адказныя за сябе, сваю сям’ю і краіну”.
Прадстаўнікі дзяржорганаў Гродзенскай вобласці падзяліліся вопытам работы па ўзаемадзеянні са СМІ, шмат карыснага можна было ўзяць на заметку з выступленняў кіраўнікоў рэспубліканскіх і рэгіянальных медыя.
Прысутныя шчыра падтрымалі прапанову міністра інфармацыі Ліліі Ананіч накіраваць ад удзельнікаў семінара тэлеграму беларускім спартсменам, удзельнікам Алімпіяды ў Рыа-дэ-Жанейра, з пажаданнем перамог.
Шмат цікавага можна было даведацца з выставы, арганізаванай сродкамі масавай інфармацыі і паліграфічнымі прадпрыемствамі Гродзеншчыны.
Падчас практычнай часткі семінара групы з абласцей наведалі розныя аб’екты ў г.Гродна, Гродзенскім, Ваўкавыскім і Лідскім раёнах.
Дэлегацыя Магілёўшчыны пабывала ў рэдакцыі вядучай абласной газеты “Гродзенская праўда”, творчы шлях якой налічвае 75 гадоў і адзначаны многімі высокімі ўзнагародамі. Аб гэтым госці даведаліся, наведаўшы музей рэдакцыі. Калегі таксама падзяліліся вопытам журналісцкай і выдавецкай дзейнасці.
Пазнаёмілася наша дэлегацыя і з напрамкамі работы РУП радыётэлецэнтр “Тэлерадыёкампанія “Гродна”.
Шмат незабыўных уражанняў пакінула экскурсія ў інтэрактыўны цэнтр навукі і тэхналогій — мультыцэнтр “Совушка” Гродзенскай абласной навуковай бібліятэкі імя Я.Карскага. Тут з дапамогай суперсучаснага абсталявання, набытага ў большасці дзякуючы атрыманым за ўдзел у розных праектах грантам, камп’ютарных праграм навучаюць, у першую чаргу, дзяцей быць на “ты” з інтэрактыўнымі тэхналогіямі.
Аб эфектыўнай рабоце знакамітага ў рэспубліцы прамысловага прадпрыемства — ААТ “Гродзенскі мясакамбінат” журналісты пачулі “з першых вуснаў” — ад яго дырэктара Анатоля Грышука, Ганаровага грамадзяніна г.Гродна. Кіраўніцтва надае ўвагу розным напрамкам работы: у цэнтры горада паспяхова працуе рэстаран мясакамбіната “Каралеўскае паляванне”, у падсобнай гаспадарцы вырошчваюцца і рэалізуюцца ўсім жадаючым фазаны, буякі, а агратурыстычны комплекс “Гародзенскі маёнтак” у в.Каробчыцы, дзе створаны найлепшыя ўмовы для адпачынку, з задавальненнем наведваюць не толькі работнікі прадпрыемства, але і шматлікія жыхары вобласці, прадстаўнікі іншых рэгіёнаў Беларусі і замежжа.
Наталля ХАДАКОВА.
Фота БЕЛТА і аўтара.
На здымках: падчас тэарэтычнай і практычнай частак семінара — міністр інфармацыі Лілія Ананіч; на выставе СМІ і паліграфіі; у інтэрактыўным цэнтры навукі і тэхналогій — мультыцэнтры “Совушка”; у “Гародзенскім маёнтку”.