Сітуацыя на спажывецкім рынку раёна пастаянна знаходзіцца пад кантролем выканаўчай улады і прадпрымаюцца ўсе неабходныя меры, каб яна заставалася стабільнай.
Наколькі спажывецкі рынак Кіраўшчыны сёння адпавядае патрэбам насельніцтва раёна, якія патрабаванні да яго ў адпаведнасці з дзяржаўнай палітыкай у гэтай сферы і перспектывы развіцця — аб гэтым ішла скрупулёзная, прынцыповая размова на сакавіцкім пасяджэнні райвыканкама з удзелам намесніка старшыні Белкаапсаюза Гадада Галімава і старшыні Магілёўскага аблспажыўсаюза Сяргея Шуркалы.
Актуальнасць разгляду пытання ў такім ракурсе старшыня райвыканкама Уладзімір Піскіжаў абгрунтаваў тым, што ў нашым раённым цэнтры склалася вялікае канкурэнтнае асяроддзе ў сферы гандлю. Летась, напрыклад, на наш спажывецкі рынак прыйшлі такія значныя ўдзельнікі, як ТАА “Евроторг”, адкрыўшы магазін “Евроопт”, і ПП “ЮЛИДторг” — магазін “Наша марка”. Задача органаў выканаўчай улады, заўважыў старшыня райвыканкама, — максімальна забяспечыць запыты насельніцтва ў неабходных таварах, прадаставіўшы ўсім суб’ектам спажывецкага рынку роўныя правы і абавязкі для работы на тэрыторыі раёна.
Нягледзячы на тое, што па выніках мінулага года наш раён заняў лідзіруючыя пазіцыі ў вобласці па сацыяльна-эканамічным развіцці, па тэмпах росту рознічнага тавараабароту па ўсіх каналах рэалізацыі мы аказаліся практычна аўтсайдэрамі. За студзень — люты гэтага года сітуацыя змянілася ў лепшы бок, але, разам з тым, пытанняў для разгляду і вырашэння яшчэ дастаткова.
Кіраўнік раёна акрэсліў некаторыя з іх: перспектывы размяшчэння аб’ектаў гандлю ў горадзе для рэалізацыі прынцыпу “шаговой доступности”, развіццё існуючай сеткі аб’ектаў гандлю і грамадскага харчавання ў адпаведнасці з сучаснымі патрабаваннямі, перспектывы па асваенні асобных таварных груп, якіх пакуль недастаткова ў раёне і іншыя.
Падрабязна аналізуючы становішча на спажывецкім рынку раёна за 2011 год і два месяцы бягучага, намеснік старшыні райвыканкама Алена Пекліна адзначыла, што ў цэлым удалося дасягнуць асноўных паказчыкаў развіцця гандлю, захавана станоўчая дынаміка рознічнага абароту.
Удасканальвалася матэрыяльна-тэхнічная база арганізацый гандлю, укараняліся новыя формы гандлёвага абслугоўвання.
Новы імпульс набыў рыначны гандаль. Таварыствам уласнікаў “Саўлад плюс” было прынята і ўвасоблена ў жыццё рашэнне аб будаўніцтве гандлёвых павільёнаў на гарадскім рынку — іх з’явілася 48. А УКП “Жылкамгас” увёў у строй міні-рынак па вул. Гагарына.
Значныя сродкі накіроўвала на развіццё матэрыяльна-тэхнічнай базы сваіх аб’ектаў райспажыўтаварыства. Але, як заўважыла дакладчык, праводзімай у гэтым напрамку работы недастаткова. Тэхнічны стан, знешні выгляд шэрагу магазінаў у горадзе і сельскіх населеных пунктах патрабуюць абнаўлення, мадэрнізацыі.
Неабходна вырашаць пытанне аб уцягненні ў гаспадарчы абарот невыкарыстоўваемых будынкаў былых аб’ектаў гандлю ў сельскай мясцовасці. Дасюль прастойваюць плошчы другога паверха ўніверсама “Цэнтральны”. Не ўсё вырашана ў арганізацыі прыдарожнага сэрвісу (райспажыўтаварыства прадстаўлена ў гэтым сегменце 3-ма аб’ектамі).
Пакуль застаецца на парадку дня пытанне ўстаноўкі на аўтадарозе Магілёў — Бабруйск гандлёвага прычэпа, аснашчанага спецыяльным гандлёвым абсталяваннем, для рэалізацыі прадукцыі кафэ “Смажанка”.
(Працяг у №29 ад 10 красавіка).