На ўрачыстым прыёме з нагоды Дня жанчын у Магілёўскім аблвыканкаме прынялі ўдзел 40 лепшых прадстаўніц гарадоў і раёнаў вобласці. Сярод іх — старшыня Паўлавіцкага сельскага Савета дэпутатаў Жанна Камінская.

Са святам 8 Сакавіка павіншаваў жанчын-працаўніц і жанчын-маці кіраўнік рэгіёна Уладзімір Даманеўскі. Ён адзначыў, што роля жанчын у грамадстве — вельмі шматгранная і неацэнная. Калі раней прафесію прадстаўніц цудоўнай паловы чалавецтва звязвалі, у асноўным, з аховай здароўя, адукацыяй, культурай, то сёння іх можна сустрэць у дзяржаўнай дзейнасці, навуцы, сферы міжнародных адносін.

Старшыня аблвыканкама падзякаваў жанчынам за працу, душэўную прыгажосць, а таксама за тое, што яны робяць для станаўлення Магілёўскай вобласці і выхавання дзяцей.

У адпаведнасці з Указам Прэзідэнта Рэспублікі Беларусь шасцёра жанчын-маці Прыдняпроўскага краю ўзнагароджаны ордэнам Маці. Уладзімір Даманеўскі ўручыў ім высокія дзяржаўныя ўзнагароды.

У гонар тых, хто знайшоў сябе ў працы, для каго асноўным заняткам сталі клопаты аб сям’і, творчыя калектывы і артысты абласнога цэнтра падрыхтавалі святочную канцэртную праграму.

Для ўдзельнікаў мерапрыемства была арганізавана экскурсія ў музей Паўла Масленікава.