На Кіраўшчыне працягваюцца сустрэчы з насельніцтвам рабочай групы райвыканкама ў саставе прадстаўнікоў раённай улады, дэпутатаў мясцовых Саветаў дэпутатаў, кіраўнікоў арганізацый і служб, якія адказваюць за забеспячэнне жыццядзейнасці сяльчан. Гэтая форма работы трывала прыжылася ў раёне і з’яўляецца вельмі запатрабаванай у жыхароў населеных пунктаў, бо ў адкрытых дыялогах па актуальных тэмах у іх ёсць магчымасць адчуць у свой адрас увагу і клопат, задаць хвалюючыя пытанні, звярнуцца з праблемамі і адпаведна атрымаць дапамогу, кампетэнтныя адказы і тлумачэнні. Усе звароты грамадзян абавязкова вывучаюцца і бяруцца на кантроль.

Для значнай колькасці сяльчан кожная такая сустрэча – яшчэ і своеасаблівая аддушына. Асабліва для жыхароў аддаленых, маланаселеных вёсачак.Часцей за ўсё гэта пажылыя людзі, многія – адзінокія ці адзінока пражываючыя Для іх непасрэдная сувязь з тым жа райцэнтрам – гэта прыезды аўталаўкі ды паштовых машын (якія, дарэчы, як было адзначана, наведваюцца згодна графіка, без нараканняў), а крыніца навін – газеты ці тэлебачанне. А вось так, калі ў вёску адначасова наведваецца такая шматлікая колькасць людзей (бывае, што іх нават больш, чым саміх жыхароў населенага пункта), якія цікавяцца тваімі клопатамі, гатовы дапамагчы ў вырашэнні тых ці іншых пытанняў, ды і проста з кім можна ад душы пагутарыць, – гэта ўжо адпавядае свайго роду маленькаму святу, бо чалавечых зносін не заменіць ніякі тэлевізар…

Менавіта такі настрой – адкрытасці, даверу, узаемаразумення – панаваў падчас сустрэч з насельніцтвам вёсак Стайкаўскага сельсавета Падсёлы, Дубцы, Шмакі, Нямкі. Сюды завіталі старшыня райвыканкама Галіна Слабоднікава, спецыялісты райвыканкама, прадстаўнікі райаддзела па надзвычайных сітуацыях, цэнтральнай райбальніцы, УКП “Жылкамгас”, райспажыўтаварыства, Кіраўскага участка паштовай сувязі. У размове прымалі ўдзел старшыня Стайкаўскага селскага Савета дэпутатаў Міхаіл Фрэйберг, дырэктар СГФ “Чыгірынка РУП “Беларуснафта-Магілёўаблнафтапрадукт” Ігар Кузняцоў.

Ва ўсіх чатырох населеных пунктах жыхары з задавальненнем удзельнічалі ў дыялогу, уважліва слухалі гасцей, па ходу задаючы цікавячыя іх пытанні.

Тэма бяспекі жыццядзейнасці была і застаецца самай актуальнай, якая абавязкова ўзнімаецца падчас прыездаў рабочай групы, бо нічога няма больш каштоўнага за жыццё і здароўе людзей. У гэтай сувязі асаблівую ўвагу жыхарам неабходна звяртаць на захаванне правілаў пажарнай бяспекі, асабліва зараз, з наступленнем халадоў. Менавіта на гэтым сакцэнтаваў увагу прысутных начальнік РАНС Сяргей Собаль.  Кожнаму домаўладальніку варта яшчэ раз праверыць печы, эксплуатаваць іх правільна. Пакоі ў дамах патрэбна абсталяваць аўтаномнымі пажарнымі апавяшчальнікамі. Як адзначыў падчас сустрэч старшыня Стайкаўскага сельскага Савета дэпутатаў Міхаіл Фрэйберг, жыхары наведваемых у гэты дзень вёсак – людзі дысцыплінаваныя і да ўласнай бяспекі ставяцца уважліва, а таму імкнуцца выконваць усе рэкамендацыі.

Была ўзнята такая важная на бягучы момант тэма, як прафілактыка каронавіруснай інфекцыі. Галоўны ўрач ЦРБ Сяргей Бычэнка расказаў пра санітарна-эпідэмічную сітуацыю ў раёне, скіраваў увагу на неабходнасць вакцынацыі, падкрэсліўшы, што гэта найбольш эфектыўны спосаб абароны ад COVID-19. Як высветлілася, гэты аспект добра разумеюць і самі вяскоўцы. Абсалютная большасць з іх прайшлі вакцынацыю. Некаторыя, зрабіўшы прышчэпку супраць каронавіруса, раілі так жа паступіць сваім суседзям, родзічам. У асобных вёсках, як, да прыкладу, у Дубцах і Нямках вакцыніраваліся ўсе жыхары.

Добрыя словы выказалі сяльчане мясцовай уладзе, кіраўніцтву СГФ “Чыгірынка”. Часта наведваецца ў вёскі Міхаіл Фрэйберг. З разуменнем і ўвагай ставіцца да просьб грамадзян, аказвае дапамогу. І яны адказваюць узаемнасцю сельвыканкаму, калі справа тычыцца навядзення парадку на зямлі, добраўпарадкавання, іншых пытанняў. Не пакідае па-за ўвагай звароты сяльчан і дырэктар СГФ “Чыгірынка” Ігар Кузняцоў. З ім, адзначылі жыхары, яны заўсёды знаходзяць узаемаразуменне ў вырашэнні бытавых праблем.

Прыйшоўшыя на сустрэчы задалі гасцям пытанні, якія тычыліся іх жыццядзейнасці. Так, у в.Падсёлы жыхар паскардзіўся на тое, што водаразборная калонка каля яго домаўладання даўно не працуе. Ды яна яму і без патрэбы. Аднак плата за карыстанне вадой налічваецца. Было дадзена даручэнне кампетэнтным спецыялістам райвыканкама разабрацца ў сітуацыі.

Пенсіянерка з Падсёл папрасіла спілаваць старое дрэва каля яе дома. Жанчыну запэўнілі, што гэтае пытанне будзе вырашана да 1 снежня бягучага года.

Ад жыхара Дубцоў паступіла просьба аб аказанні дапамогі ў рамонце калодзежнага зруба. Узяць на кантроль яе даручана кіраўніцтву Стайкаўскага сельвыканкама і УКП “Жылкамгас”.

Некалькі пытанняў задалі жыхары Нямкоў. Так, яны папрасілі дапамагчы засыпаць яміну на дарозе каля мясцовых могілак. Кіраўніцтву СГФ “Чыгірынка” і УКП “Жылкамгас” даручана разабрацца з гэтым пытаннем да пачатку снежня бягучага года.

Паступіла заўвага аб тым, што ў паліклініцы ЦРБ ствараюцца вялікія чэргі на прыём да ўрачоў. Жыхарам адказалі, што ў бліжэйшы час будуць праведзены маніторынг, каб вывучыць сітуацыю, а таксама ўнесены адпаведныя прапановы.

Хапіла месца ў размовах і для сур’ёзных тэм, і нават для жартаў. У любым выпадку жыхары аддаленых вёсак засталіся з добрым настроем і задаволенымі ад сустрэч – гэта было відавочна.

Аляксандр ХАХЛОЎ.

Фота аўтара.