Як толькі ўсталяваліся спрыяльныя пагодныя ўмовы, у гаспадарках раёна веснавыя палявыя работы разгарнуліся шырокім фронтам.  У сераду карэспандэнты раённай газеты пабывалі на палетках СВК “Рассвет” імя К.П.Арлоўскага і пацікавіліся ходам сяўбы, якая тут ідзе арганізавана. 

Як адзначыў першы намеснік старшыні СВК “Рассвет” імя К.П.Арлоўскага Аляксандр Жылінскі згодна рабочага плана ў гаспадарцы неабходна пасеяць азімую пшаніцу на 2413 га, ячмень – на 945 га, зернебабовыя – на 712 га, кукурузу – на 3147 га. Завяршыць сяўбу тут плануюць у аптымальныя тэрміны.
У гаспадарцы выконваецца ўвесь спектр веснавых работ: рыхтуецца глеба для сяўбы ранніх збожжавых і зернебабовых, раскідваецца і заворваецца арганіка, праводзіцца падкормка і падсеў шматгадовых траў і пашаў.
Ва ўсю распачата ворыва, на сераду ўжо ўзарана 692 га. Механізатары Валерый Піскуноў і Віталь Кашкоў старанна выконваюць свае абавязкі, адказна ставяцца да справы.
Сяўбу ў гаспадарцы пачалі з аўса, на 6 красавіка засеялі 122 га. З сярэдзіны тыдня пачалі сеяць зернебабовыя культуры. На палетках за-дзейнічаны два пасяўныя агрэгаты. Пазменна тут працуюць вопытныя і адказныя механізатары Мікалай Белакурскі і Міхаіл Вербенка.Яны заўсёды ў ліку перадавікоў і ўнутрыгаспадарчага, і раённага спаборніцтваў. Справу сваю ведаюць выдатна. На падвозцы насення задзейнічаны Дзяніс Сакабіцкі і Аляксандр Турловіч.
Адна з немалаважных задач–закрыццё вільгаці. Неспрыяльныя пагодныя ўмовы мінулага года не лепшым чынам паўплывалі на колькасць вільгаці ў глебе, яна хутка выпарваецца, таму механізатар Юрый Каранкевіч спяшаецца правесці гэтыя работы ў найкарацейшыя тэрміны, бо разумее, што ад гэтага ў многім залежыць будучы ўраджай збожжавых і зернебабовых культур.
У гаспадарцы створаны ўсе ўмовы для высокапрадукцыйнай працы на веснавых палетках. Тэхніка падрыхтавана і адрамантавана, усе механізатары забяспечваюцца гарачымі абедамі, працаўнікі поўнасцю ўкамплектаваны сродкамі індывідуальнай абароны і спецвопраткай. Надаецца значная ўвага захаванню тэхнікі, бяспекі.
Механізатары, вадзіцелі шчыруюць на палетках, каб забяспечыць высокія тэмпы і якасць сяўбы, атрымаць дастойны ўраджай.
Ірына БАБІЧ.

Фото Максіма МІКЕШЫНА.