У памяці і сэрцы назаўсёды
Урачысты прыём, прымеркаваны да 25-годдзя вываду абмежаванага кантынгенту савецкіх войск з Афганістана, правёў 12 лютага старшыня Магілёўскага аблвыканкама Пётр Руднік. У мерапрыемстве прыняў удзел памочнік Прэзідэнта Рэспублікі Беларусь — галоўны інспектар па Магілёўскай вобласці Генадзь Лаўранкоў.
На ўрачысты прыём былі запрошаны больш 20 чалавек — сем’і загінуўшых воінаў-інтэрнацыяналістаў, кіраўнікі гарадскіх і раённых арганізацый ГА “Беларускі саюз ветэранаў вайны ў Афганістане”, воіны-інтэрнацыяналісты.
У сустрэчы прымалі ўдзел і прадстаўнікі нашага раёна: старшыня раённай арганізацыі Беларускага саюза ветэранаў вайны ў Афганістане Юрый Сафронаў і воін-інтэрнацыяналіст Уладзімір Перадня, узнагароджаны ордэнам «Чырвоная Зорка», медалямі “За адвагу”, “За бездакорную службу” 2-й і 3-й ступеней і іншымі.
У ходзе мерапрыемства найбольш актыўныя ўдзельнікі афганскага руху ў рэгіёне былі адзначаны Ганаровымі граматамі аблвыканкама і абласнога Савета дэпутатаў, а таксама грашовымі прэміямі.
Ганаровай граматай абласнога выканаўчага камітэта быў узнагароджаны Уладзімір Перадня.
Акрамя таго, у адпаведнасці з нядаўна падпісаным загадам Міністра абароны Беларусі пецярым кіраўнікам раённых арганізацый саюза ветэранаў вайны ў Афганістане, атрымаўшым чарговыя воінскія званні, былі ўручаны пагоны. Пагоны маёра атрымаў Юрый Сафронаў.
Як адзначылі пасля прыезду ў Кіраўск нашы землякі, падчас сустрэчы Пётр Руднік падкрэсліў важную ролю Беларускага саюза ветэранаў вайны ў Афганістане, як арганізацыі ветэранаў баявых дзеянняў, у героіка-патрыятычным выхаванні грамадзян, у першую чаргу, маладога пакалення. З моманту заканчэння афганскай вайны мінула чвэрць стагоддзя, і заўжды наша краіна шануе подзвігі воінаў-інтэрнацыяналістаў і памятае імёны тых, хто загінуў на той кровапралітнай вайне.
На сустрэчы было прынята рашэнне аб стварэнні ў Магілёўскай вобласці музея воінскай славы.
Таксама ўдзельнікам паведамілі, што воіны-інтэрнацыяналісты Магілёўшчыны і сем’і загінуўшых воінаў атрымаюць адрасную матэрыяльную дапамогу. На гэтыя мэты з абласнога бюджэту выдаткавана 150 млн. рублёў.
На здымку: старшыня Магілёўскага аблвыканкама Пётр Руднік уручае Ганаровую грамату абласнога выканаўчага камітэта нашаму земляку Уладзіміру Перадні.
Фота БЕЛТА.
