Уладар сяла. Хто ён? Адказ на гэтае пытанне паспрабавалі знайсці маладыя сем’і — удзельнікі раённага этапа аднайменнага конкурсу. Прайшоў ён у межах святкавання раённага фестывалю-кірмашу працаўнікоў вёскі “Дажынкі-2016” у аг.Барсукі. Ідэйным натхняльнікам і арганізатарам мерапрыемства выступіў РК ГА “БРСМ” пры падтрымцы раённага выканаўчага камітэта і ЦБП №709 г.Кіраўска філіяла №703 ААТ “ААБ Беларусбанк”.

Конкурс “Уладар сяла” стаў традыцыйным для Кіраўшчыны і прыходзіцца даспадобы многім яе жыхарам, стаўшы сапраўдным святам калектыўнага сямейнага адпачынку. Яго мэты і задачы — садзейнічанне замацаванню маладых сем’яў у вёсцы; фарміраванне ў моладзі патрыятызму; папулярызацыя сельскагаспадарчай працы і прафесій; актывізацыя работы па добраўпарадкаванні ўласных падвор’яў сяльчан; стымуляванне маладых сем’яў, якія вядуць прысядзібную гаспадарку на высокім гаспадарчым узроўні; адраджэнне працоўных дынастый, умацаванне сямейных традыцый і пераемнасць пакаленняў; прыцягненне моладзі вёскі да здаровага ладу жыцця і г. д.
Удзел у мерапрыемстве прынялі тры сям’і: Яўген і Валянціна Котавы з дочкамі Анастасіяй і Аляксандрай з аг.Барсукі, Андрэй і Анжэла Горбач з дзецьмі Маргарытай і Віялетай з аг.Мышкавічы, Сяргей і Кацярына Глушаковы з аг.Паўлавічы.
Пачалася конкурсная праграма са знаёмства. Кожная каманда павінна была расказаць пра сябе: у прозе, з дапамогай вершаў ці песень. Па сутнасці, гэта была візітная картка ўдзельнікаў, і ўмова тут толькі адна — як мага больш арыгінальна, цікава і весела расказаць аб сваёй сям’і, аб трыдыцыях, захапленнях, любімым сямейным хобі.
А як спрытна сямейныя пары пілавалі і секлі дровы, а затым складвалі. Было бачна, што гэтая справа для іх звыклая. Хуткасць і ўважлівасць, уменне працаваць у пары прадэманстравалі канкурсанты на этапе “Бульбашы”: галоўнае тут было як мага хутчэй адсартаваць вялізную бульбу ад дробнай.
Вясёлым і цікавым атрымаўся чарговы этап конкурсу “Рыхтуем запасы на зіму”: татам з дзецьмі трэба было сапраць па полі агуркі і зялёную прыправу, а мамам — іх закатаць у слоікі.
Па-сапраўднаму сямейным стаў конкурс “Сялянскія прысмакі”: жанчыны гатавалі беларускую нацыянальную страву, а астатнія займаліся яе ўпрыгожваннем.
Відовішчным атрымаўся конкурс “Выстава дасягненняў сямейнай гаспадаркі”, дзе неабходна было прадставіць на суд журы выставу-прэзентацыю прадметаў сямейнай творчасці.
Сваю эрудыцыю і дасведчанасць дэманстравалі канкурсанты ў намінацыі “Родны край” пры адказах на пытанні аб гісторыі і культуры нашай вобласці.
Выпрабаванні завяршыліся, і канкурсанты з хваляваннем чакалі вынікаў. Сёлета ганаровы тытул “Уладар сяла” заваявала сям’я Горбач з Мышкавіч. Другое і трэцяе месцы раздзялілі паміж сабой сем’і Котавых з Барсукоў і Глушаковых з Паўлавіч. Усе атрымалі дыпломы і каштоўныя падарункі ад спонсараў: райкама ГА “БРСМ”, раённых грамадскіх аб’яднанняў “Белая Русь” і “Фонд міру”, раённага аб’яднання арганізацый прафсаюзаў, уваходзячых у Федэрацыю прафсаюзаў Беларусі.
Наперадзе ў сям’і Горбач абласны этап конкурса, на якім трэба будзе даказаць, што на кіраўскай зямлі жывуць сапраўдныя гаспадары роднай зямлі, працавітыя і дружныя сем’і.
Людміла СЯМЁНАВА.
Фота Яўгена ПІШЧАЛІНА.