Сёлетні год для калектыву інспекцыі Міністэрства па падатках і зборах Рэспублікі Беларусь па Кіраўскім раёне — юбілейны: чвэрць стагоддзя яе супрацоўнікі  займаюцца папаўненнем бюджэту, забеспячэннем паўнаты паступленняў падаткаў у казну. Ад гэтага залежыць, як будуць развівацца  адукацыя, медыцына, культура, выплачвацца пенсіі, аказвацца дапамога маламаёмным грамадзянам і іншыя сацыяльныя гарантыі. 

Напярэдадні прафесійнага свята мы сустрэліся з начальнікам інспекцыі Віктарам КАРАНКЕВІЧАМ і па-прасілі расказаць аб выніках дзейнасці калектыву ў бягучым годзе, а таксама падзяліцца перспектывамі на будучае:
—Праводзімая інспекцыяй сістэматычная работа па безумоўным выкананні даведзеных планавых паказчыкаў і мабілізацыі дадатковых паступленняў з года ў год дазваляюць нашаму калектыву забяспечваць выкананне даходнай часткі бюджэту ўсіх узроўняў. За мінулы год у кансалідаваны бюджэт раёна паступіла 92,2 млрд. руб. (104,6%), у рэспубліканскі — 7,2 млрд. руб. (113,2%), у мясцовы — 85 млрд. руб. (104%). Звыш плана мабілізавана 4,1 млрд.руб.
Бюджэт раёна папаўняюць 11 тыс. плацельшчыкаў падаткаў: 303 арганізацыі, 233 індывідуальныя прадпрымальнікі, астатняя колькасць — фізічныя асобы.
Найбольшыя сумы плацяжоў паступаюць ад СВК “Рассвет” імя К.П.Арлоўскага — 13,1 млрд. руб., райспажыўтаварыства — 8,8 млрд. руб., УКП “Жылкамгас” і ПМК-255 — па 5,7 млрд. руб., ДРБУ-197 — 2,6 млрд. руб., ААТ “ПМК-97 Вадбуд”— 2,4 млрд. руб.
Улічваючы вызначальны ўплыў бюджэтаўтвараючых арганізацый на фарміраванне даходнай часткі бюджэту раёна, работа з дадзенай катэгорыяй плацельшчыкаў з’яўляецца адным з прыярытэтных накірункаў у дзейнасці інспекцыі. Дарэчы, за мінулы год за кошт дзяржаўных арганізацый сфарміравана 68,1% паступленняў раённага бюджэту.
Разам з тым, у сувязі з развіццём і ўмацаваннем малога і сярэдняга бізнэсу ў цяперашні час адбываецца пераразмеркаванне доляў удзелу ў фарміраванні бюджэту дзяржаўнага і недзяржаўнага сектараў эканомікі, што абумоўлівае неабходнасць больш пільнай увагі гэтым суб’ектам гаспадарання. Тым больш, што перад калектывам пастаўлена задача — знайсці магчымасці для павелічэння паступленняў у бюджэт.
У першую чаргу, неабходна скарачаць аб’ёмы неназіраемай эканомікі. На думку экспертаў, у нашай краіне ад 10 да 30% эканомікі складае ценявы рынак, які не плаціць ніякія падаткі. Таму прадпрымаюцца значныя намаганні, каб кантрольная дзейнасць была эфектыўнай.
У першым паўгоддзі бягучага года праверана дзейнасць 45 дзеючых аб’ектаў і 33 суб’ектаў гаспадарання, якія знаходзяцца ў стадыі ліквідацыі. Па выніках праверак прад’яўлена да ўплаты 987,7 млн. руб. падаткаў. З ценявога абароту канфіскавана таварна-матэрыяльных каштоўнасцей на суму 255,2 млн. руб. З кожнага рубля, атрыманага інспекцыяй на правядзенне кантрольных закупак, у бюджэт вернута 1243 руб.
Вядома, што поспех любой справы залежыць ад людзей, якія дзякуючы сваім добрасумленным адносінам да даручанага ўчастка работы і высокаму прафесіяналізму заслужылі аўтарытэт і павагу сярод калег, а таксама падаткаплацельшчыкаў. Адчувальны ўклад у станаўленне і развіццё падатковай службы раёна ўнеслі ветэраны працы Я.Г.Бяляўскі, В.І.Дайнека, В.П.Шалыгін, І.І.Печань, Г.Ф.Борэкава, П.П.Акуліч, В.Ф.Сакалоўская, Л.С.Пятруша.
Нельга не ўспомніць і аб тых, каго ўжо няма побач з намі, але памяць аб іх будзе жыць у нашых сэрцах. Гэта — І.М.Зазерская, І.Б.Аляхно, Т.Ф.Аляхно, В.І.Печань. У свой час гэтыя людзі працавалі сумленна, прымяняючы вопыт і веды дзеля агульнай справы.
Сёння ў калектыве працуюць спецыялісты, узровень кваліфікацыі і дзелавыя якасці якіх дазваляюць паспяхова вырашаць задачы па рэалізацыі дзяржаўнай эканамічнай палітыкі ў сферы падаткаабкладання. Шмат гадоў вынікова працуюць С.У.Русецкі, С.Р.Акушэвіч, А.Л. Балабашкова, І.А.Кітова, А.І.Малічэнка, А.М.Рудак. Стараннасцю вызначаюцца і маладыя спецыялісты — К.С.Новікаў, Н.І.Вакір, В.С.Жукоўская, В.П.Салянкіна. 91,7% работнікаў інспекцыі маюць вышэйшую адукацыю.
Менавіта сплаў вопыту і ініцыятывы дазволілі калектыву інспекцыі двойчы стаць пераможцамі рэспубліканскага агляду-конкурсу на лепшую інспекцыю Міністэрства па падатках і зборах Рэспублікі Беларусь у 2009 і 2014 г.г. Неаднаразова мы выходзілі пераможцамі абласных спаборніцтваў.
Штодзённая работа спецыялістаў падатковай інспекцыі — гэта рэальны ўклад у стабільнасць і развіццё раёна, фінансавы дабрабыт яго жыхароў.
Падрыхтавала
Таццяна БАРАДЗІНА.