Усе думкі — пра палявыя работы

Усе думкі і імкненні аграрыяў зараз накіраваны на тое, каб арганізавана, у аптымальныя тэрміны правесці веснавыя палявыя работы, закласці трывалы фундамент ураджаю-2014. Гэтыя намеры на першым плане зараз і ў кіраўніцтва, працаўнікоў СВК “Калгас “Рассвет” імя К.П.Арлоўскага.
Клопатамі пра будучую сяўбу жыве  механізатар гаспадаркі Міхаіл Вербенка: яму прадстаіць працаваць у полі на сеялцы “Амазонія” ў счэпцы з трактарам “Джон-Дзір”. А пакуль ён заняты на падрыхтоўчых работах — пагрузцы арганічных угнаенняў, дзе Міхаіла Васільевіча і заспеў аб’ектыў рэдакцыйнай фотакамеры.
Надыходзячы красавік для механізатара — знамянальны: ён адлічыць 25 гадоў працы на карысць “Рассвета” —  добрасумленнай, плённай, адзначанай высокімі дасягненнямі. Нагадаем, што М.В.Вербенка стаў пераможцам рэспубліканскага спаборніцтва за дасягненне высокіх паказчыкаў на ўборцы ўраджаю збожжавых і зернебабовых культур, нарыхтоўцы травяных кармоў у 2013 годзе ў намінацыі за дасягненне высокіх паказчыкаў на нарыхтоўцы травяных кармоў. Узнагародамі за 1 месца былі Ганаровы дыплом і легкавы аўтамабіль.
І сёлета падчас “зялёнага жніва” перадавы механізатар будзе шчыраваць на нарыхтоўцы кармоў для грамадскага статка на кормаўборачным камбайне Krone Big X 700. Мы жадаем, каб ён паўтарыў леташні рэзультат!
На здымку: механізатар Міхаіл Вербенка заўсёды адказна выконвае любую даручаную работу.
Фота Максіма Мікешына.