Вадзіцель Кіраўскага УКП “Жылкамгас” — у ліку прызёраў абласнога конкурсу
На Магілёўшчыне ўпершыню прайшоў конкурс прафесійнага майстэрства сярод вадзіцеляў смеццявозаў. Спаборніцтвы сабралі 20 удзельнікаў — работнікаў жыллёва-камунальнай службы з усіх раёнаў вобласці. У лік прызёраў трапіў прадстаўнік нашага раёна: вадзіцель УКП “Жылкамгас” Іван Прыгажаеў заняў трэцяе месца.
Конкурс праходзіў на базе абласнога “ДТСААФ” і быў прымеркаваны да 750-годдзя Магілёва. Па ўмовах спаборніцтваў да ўдзелу былі дапушчаны толькі тыя вадзіцелі, якія за апошнія 12 месяцаў не былі віноўнікамі дарожна-транспартных здарэнняў, не прыцягваліся за парушэнні працоўнай і вытворчай дысцыпліны. Па сутнасці, практычна ўсе канкурсанты — віртуозы сваёй справы, якія выдатна валодаюць вадзіцельскімі навыкамі, спецыяльнай тэхнікай, з дапамогай якой наводзяць чысціню. А ім, між тым, даводзіцца працаваць у асаблівых умовах: трэба быць дакладнымі, акуратнымі, каб абслугоўваць двары і дамавыя тэрыторыі, якія часта бываюць застаўленымі аўтамабілямі, а побач на пляцоўках гуляюць дзеці…
На шляху да перамогі ў абласным конкурсе ўдзельнікам трэба было прайсці праз тры этапы выпрабаванняў: конкурс на веданне Правілаў дарожнага руху, праверку ведаў устройства і тэхнічнага абслугоўвання аўтамабіля, а таксама самае відовішчнае заданне — дэманстрацыю ваджэння спецыяльнай аўтамашыны-смеццявоза.
У катэгорыі вадзіцеляў смеццявозаў з задняй загрузкай Іван Прыгажаеў паказаў ва ўсіх трох конкурсах высокія рэзультаты і ў агульным выніку заняў трэцяе месца.
Калі паўстала пытанне: каго адправіць на конкурс ад нашага раёна, ва УКП “Жылкамгас, доўга вырашаць не давялося: вырашылі накіраваць Івана Прыгажаева — бадай, найбольш вопытнага сярод выдатных спецыялістаў і сумленных работнікаў. Адразу пасля службы ў арміі ён быў залічаны ў састаў вадзіцеляў прадпрыемства, і з таго часу прайшло ўжо 30 год! Іван Яфімавіч выдатна спраўляецца са сваімі абавязкамі,а высокую прафесійную кваліфікацыю штодзень пацвярджае практыкай, таму ў паспяховым яго выступленні на конкурсе ніхто з тых, хто яго ведае, не сумняваўся.
Аляксандр ХАХЛОЎ.
Фота Максіма МІКЕШЫНА.