Па вуліцы імя Кірава райцэнтра адбылося святочнае шэсце калон, на чале якога былі воіны тэрміновай службы са Сцягам Перамогі. Пад музыку духавога аркестра “Фанфары Кіраўска” крочылі прадстаўнікі раённай улады, сілавых структур, раённых структур грамадскіх аб’яднанняў, дэлегацыі працоўных калектываў.

Каля галоўнай плошчы горада былі разгорнуты тэматычныя тэатралізаваныя пляцоўкі “Жывая сцяна памяці”: увасобленыя на іх эпізоды Вялікай Айчыннай вайны краналі душу кожнаму, прымушалі перажываць тыя падзеі. 

На імправізаванай сцэне каля будынка райвыканкама адбыўся тэатралізаваны канцэрт “Вайны свяшчэнныя старонкі навечна ў памяці людской”.

Сёння, у Дзень Перамогі, адзначаецца Дзень Дзяржаўнага герба Рэспублікі Беларусь і Дзяржаўнага флага Рэспублікі Беларусь. Як падкрэслілі вядучыя, гэтыя сімвалы нашай краіны адлюстроўваюць гістарычныя, духоўныя і маральныя рысы нацыі, асаблівасці культуры і светапогляду беларускага народа, яго імкненне да самавызначэння і самастойнага разві

цця. Мы шануем іх гэтак жа, як роднае слова, родную культуру, як родны дом. Для кожнага з нас яны – сімвал Радзімы.

Нібы кадры кінафільма, на сцэне змяняліся карціны з гадоў ваеннага ліхалецця, якія кранальна адлюстравалі культработнікі, самадзейныя артысты раёна, а таксама школьнікі, моладзь – нашчадкі салдат Перамогі. Гучалі знаёмыя ўсім ваенныя песні, іграў духавы аркестр.

У фінале канцэрта любімую ўсімі песню “Дзень Перамогі” разам з удзельнікамі спявала ўся плошча. А ў неба жыццесцвярджальна былі выпушчаны чырвона-зялёныя паветраныя шары як сімвал мірнага жыцця, светлай будучыні нашай роднай Беларусі.

У горадзе працавалі дзіцячыя пляцоўкі, на гарадскім стадыёне праводзіліся спартыўныя мерапрыемствы.

Запланаваны і вячэрні святочны канцэрт, святочная дыскатэка.

Фота Максіма МІКЕШЫНА.