Не здае сваіх лідзіруючых пазіцый самая буйная гаспадарка раёна — СВК “Рассвет” імя К.П.Арлоўскага. Галоўны экзамен хлебаробаў — жніво — рассветаўцы вытрымалі на выдатна. Сёлетні іх хлебны каравай атрымаўся цяжэй леташняга, што дазволіла калектыву заняць першае месца ў раённым спаборніцтве за дасягненне высокіх паказчыкаў на ўборцы ўраджаю збожжавых і зернебабовых раслін. 

Захаванне тэхналагічных патрабаванняў і агратэхнічных прыёмаў, своечасовае правядзенне сяўбы і адказная праца занятых ва ўборачнай кампаніі людзей далі свой плён: валавы збор збожжа і рапса ў гаспадарцы склаў 14183 т з агульных 4348 га пасяўных плошчаў збожжавых і зернебабовых культур (без уліку кукурузы на зерне), пры бале пашы 39,1.
“Жніво — справа агульная” — такім быў дэвіз рассветаўскіх хлебаробаў: кожны на сваім рабочым месцы стараўся зрабіць усё магчымае, каб сабраць вырашчаны ўраджай якасна і ў сціслыя тэрміны. Штодня на палетках працавала 12 камбайнаў, за штурваламі якіх былі вопытныя, аддадзеныя сваёй справе людзі. За плячыма многіх з іх дзясяткі збожжаўборачных кампаній, шматлікія падзякі і ўзнагароды за плённую працу. Так, першым у вобласці тысячны рубеж па намалоце збожжавых перакрочыў экапіж у саставе старшага камбайнера Івана Салановіча і камбайнера Івана Багеля. Па выніках раённага спаборніцтва тры першыя месцы ў асабістым заліку таксама на рахунку прадстаўнікоў з “Рассвета”: старшых камбайнераў Мікалая Дразда, Аляксандра Бяляўскага і Мікалая Белакурскага.
Бесперапынную дастаўку збожжа на ачышчальна-сушыльныя комплексы ажыццяўлялі 10 адзінак тэхнікі. Малады вадзіцель Дзяніс Сакабіцкі першым на Магілёўшчыне пераадолеў рубеж у 1000 т на перавозцы збожжа ад камбайнаў. А ўвогуле на рахунку Дзяніса падчас сёлетняй уборачнай кампаніі больш за 2000 т.
Своечасова і дасканала падрыхтаваная сельгастэхніка працавала практычна без збояў, не спыняючы ні на хвіліну складаны працэс уборкі хлеба. Усе рамонтныя і абслугоўваючыя работы праводзіліся своечасова, у чым немалая заслуга галоўнага інжынера сельгасарганізацыі Аляксея Пятрушы.
Увогуле 8 рассветаўскіх экіпажаў збожжаўборачных камбайнаў намалацілі больш, чым па 1000 т збожжа, столькі ж вадзіцеляў перавезлі больш, чым па 1000 т на ачышчальна-сушыльныя комплексы і камбінаты хлебапрадуктаў.
Як адзначыў першы намеснік старшыні гаспадаркі Аляксандр Жылінскі, сёлетні намалот збожжавых і зернебабовых культур, а намалочана на 1282 т больш леташняга паказчыка — заслуга спецыялістаў і механізатараў. Усе хімапрацоўкі і падкормкі праводзіліся своечасова, у адпаведнасці з тэхналагічнымі патрабаваннямі, гэты працэс поўнасцю быў пад кантролем агранома па абароне раслін Андрэя Скраблевіча. Паклапаціліся і аб наяўнасці пад поўную патрэбу гаруча-змазачных матэрыялаў і запасных частак для сельгастэхнікі.
Сярод фактараў, аказаўшых адмоўны ўплыў наўраджайнасць збожжавых, а сёлета ў гаспадарцы атрымалі па 47,2 ц/га, Аляксандр Жылінскі назваў пагодныя. Пэўная колькасць азімых дрэнна перанесла няўстойлівае надвор’е ўзімку: таму іх вымушаны былі ўбраць на сянаж. Не лепшым чынам адбілася на каласавых і летняя спякота. Аднак, па словах спецыяліста, у гаспадарцы былі прадпрыняты ўсе магчымыя меры, каб сабраць ураджай да апошняга зярнятка.
З адказнасцю падышлі рассветаўцы да выканання дзяржзаказу: на прыёмныя пункты было адпраўлена 2660 т, што склала 101,7% да плана. Прычым больш за 70% збожжа прынята хлебакамбінатамі 3-м класам па масавай долі клейкавіны, што дазволіла сельгаспрадпрыемству атрымаць дадатковую грашовую выручку.
Немалаважным звяном у збожжаўборачным ланцугу Аляксандр Жылінскі назваў старанную працу работнікаў чатырох маючыхся ў гаспадарцы ачышчальна-сушыльных комплексаў. Работы тут не прыпыняліся ні ўдзень, ні ноччу, прычым сушылкі былі загружаны на поўную магутнасць.
Адным з фактараў зладжана праведзенай уборкі хлеба можна назваць увагу і клопат кіраўніцтва аб удзельніках жніва. Усе былі забяспечаны гарачым харчаваннем, дзейнічалі меры маральнага і матэрыяльнага заахвочвання, арганізавана спаборніцтва, вынікі якога штодзённа адлюстроўваліся ў інфармацыйных бюлетэнях. У гонар перадавікоў уборачнай кампаніі ўзнімалі флаг працоўнай славы.
Цяперашні клопат рассветаўцаў — пра ўраджай-2017. Пад поўную патрэбу засыпана насенне збожжавых і зернебабовых культур. Актыўнымі тэмпамі вядзецца сяўба азімых. А гэта значыць, густой сцяной будзе зноў каласіцца хлебная ніва, долу нахіляцца налітыя каласы на радасць хлебаробам.
Людміла Сямёнава.