Шлях да поспеху ляжыць праз карпатлівую штодзённую працу. У праўдзівасці гэтага сцвярджэння на ўласным прыкладзе пераканаўся вучань 11 класа СШ №2 г.Кіраўска імя.К.П.Арлоўскага Кірыл Акуліч, які стаў адным з лепшых на 3-м, абласным этапе рэспубліканскай алімпіяды па фізіцы. Па выніках выпрабаванняў ён быў узнагароджаны дыпломам 2 ступені і тым самым даказаў высокі ўзровень ведаў, эрудыцыю, мэтанакіраванасць, упарты характар.
Удзельнікам алімпіяды неабходна было ў першым туры прадэманстраваць свае тэарэтычныя веды, у другім — правесці практычныя доследы. Па сумах двух тураў прафесійнае журы вызначыла спіс лепшых, у які трапіў юны фізік-даследчык з Кіраўшчыны.
Адзінаццацікласнік падзяліўся сваімі ўражаннямі: «Я хваляваўся, не чакаў, што займу прызавое месца, і вельмі задаволены. Гэта мая першая перамога такога ўзроўню. Да фізікі я пранікнуўся асаблівай цікавасцю з 7 класа, і з таго часу рэгулярна павышаў свае веды, спрабаваў даведацца як мага больш, праводзіў эксперыменты. Мне было настолькі цікава, што я не шкадаваў часу і “грыз” граніт навукі. Я ўпэўнены, што, каб чагосьці дасягнуць, трэба любіць тое, што ты робіш — тады ў цябе рана ці позна ўсё атрымаецца!».
Як адзначыў Кірыл Акуліч, алімпіяда абавязкова змяшчае заданні, якія не ўваходзяць у курс школьнай праграмы, і каб годна прадставіць свой раён, прыходзілася рэгулярна павышаць свой узровень ведаў па прадмеце не толькі падчас урокаў, але і з дапамогай факультатыўных заняткаў, дадатковых заняткаў з педагогам і самастойна.
А яшчэ высокія дасягненні непазбежныя, калі ёсць свой натхняльнік, якім для Кірыла стаў яго настаўнік фізікі Уладзімір Анатольевіч Касцючэнка (на здымку).

У сваёй перамозе вучань бачыць велізарную заслугу свайго таленавітага, вопытнага педагога У.А.Касцючэнкі, які ўжо больш за 20 гадоў выхоўвае любоў да гэтага нялёгкага, але цікавага прадмета ў дзясяткаў школьнікаў, шырока выкарыстоўвае ў сваёй педагагічнай дзейнасці інавацыйныя тэхналогіі, неардынарна, творча падыходзіць да выкладання фізікі ў школе. І яго самааддача знаходзіць водгук у сэрцах выхаванцаў: штогод вучні паказваюць высокія вынікі на разнастайных конкурсах, на годным узроўні здаюць і цэнтралізаванае тэставанне.
У цяперашні час Кірыл таксама рыхтуецца да яго здачы. Куды канкрэтна будзе паступаць, яшчэ не вырашыў, але ўжо вызначыўся з прадметамі — акрамя фізікі яму трэба будзе здаць матэматыку і беларускую мову.
А да паступлення здольнаму вучню трэба будзе яшчэ раз паказаць свае веды — Кірыл будзе прадстаўляць наш раён і вобласць на заключным, рэспубліканскім, этапе алімпіяды па фізіцы, які пройдзе ў Мінску ў канцы сакавіка.
Настасся ЛОГВІНАВА.
Фота Максіма МІКЕШЫНА.