Калектыў цэнтра банкаўскіх паслуг №617 у Кіраўску Рэгіянальнай дырэкцыі па Магілёўскай вобласці ААТ “Белаграпрамбанк” невялікі – 13 чалавек, якія мэтанакіравана і добрасумленна працуюць дзеля якаснага абслугоўвання кліентаў установы, з увагай і клопатам ставяцца да кожнага, хто давярае ім свой фінансавы дабрабыт.
З кастрычніка бягучага года згуртаваную каманду супрацоўнікаў цэнтра банкаўскіх паслуг узначаліў малады ініцыятыўны кіраўнік – Арцём Караткевіч. Уся яго прафесійная біяграфія звязана менавіта з “Белаграпрамбанкам”. “Родам я з Бабруйска. Калі вучыўся ў школе, то дакладна разумеў, што будучая мая прафесія будзе звязана менавіта з лічбамі і разлікамі ў галіне эканомікі, – падзяліўся ўспамінамі Арцём Мікалаевіч. – Пасля заканчэння Палескага дзяржуніверсітэта размеркаваўся працаваць у адно з аддзяленняў “Белаграпрамбанка” у родным горадзе. Пачынаў з пасады спецыяліста па аказанні рознічных паслуг. У абранай прафесіі не толькі не расчараваўся, але і ўзнікла жаданне развівацца, павышаць свой прафесійны ўзровень, працаваць самааддана не толькі на асабістую карысць, а і для агульнага дабрабыту калектыву. Лічу, што за 9 год дасягнуў пэўных вышынь у кар’еры: да назначэння на пасаду начальніка цэнтра ў г.Кіраўску ўзначальваў аддзел па рабоце з карпаратыўным бізнесам ЦБУ №624 у Бабруйску”.
Арцём Караткевіч расказаў, што калектыў кіраўскага цэнтра сустрэў яго ветліва: “Я адразу адчуў, што трапіў у каманду аднадумаў, і не памыліўся, адчуваю патдрымку і разуменне з боку калег”.
Таварыства, у тым ліку і цэнтр у Кіраўску, пазіцыяніруе сябе як банк, які актыўна супрацоўнічае непасрэдна з прадпрыдпрыемствамі аграпрамысловага комплексу, аказвае падтрымку развіццю малога і сярэдняга бізнесу – у асноўным у рэгіёнах. Па словах Арцёма Мікалаевіча, кожны наведвальнік цэнтра зможа знайсці патрэбную яму інфармацыю, атрымаць кваліфікаваную кансультацыю і шырокі спектр паслуг – на любы густ. А дапамогуць у гэтым спецыялісты – ветлівыя, адкрытыя да зносін, уважлівыя, добразычлівыя і адказныя – менавіта такімі якасцямі вылучаюцца сучасныя банкаўскія работнікі.
Сярод прадстаўнікоў калектыву ёсць “доўгажыцелі”, якія працуюць у банку практычна з самага яго заснавання, перад іх вачыма прайшлі розныя этапы станаўлення і развіцця ўстановы. З кагорты такіх начальнік сектара карпаратыўнага бізнесу Ала Елісеенка. Яе агульны працоўны стаж у банкаўскай галіне складае 30 гадоў, 23 з якіх – на карысць “Белаграпрамбанка”. Вопытам у рабоце вылучаецца галоўны спецыяліст аддзела рознічных продажаў Ніна Некрашэвіч, якая пачала свой прафесійны шлях у банкаўскай галіне ў 2007 годзе.
Нараўне з вопытнымі калегамі шчыруе і моладзь. Фізічныя асобы абслугоўваюць спецыялісты аддзела рознічных продажаў Аліна Фралова, Крысціна Барбарош, Наталля Пырко. Дзяўчаты актыўна асвойваюць прафесію, радуюць кіраўніцтва першымі поспехамі.
“Каманда ў нас ёсць! Кожны зацікаўлены ў тым, каб рэалізаваць намечаныя планы, удасканаліць напрацаванае. Мы шчыруем на агульны поспех, дзеля якаснага абслугоўвання нашых паважаных кліентаў”, – падвёў вынік гутаркі Арцём Караткевіч.
Яўгенія БЯЛЬКО.
Фота Максіма МІКЕШЫНА.
На здымку: начальнік аддзела рознічных продажаў Надзея Стэльмакова (першая справа), начальнік цэнтра Арцём Караткевіч, начальнік сектара карпаратыўнага бізнесу Ала Елісеенка.