Дзень выратавальніка ў нашай рэспубліцы адзначаецца з 19 сту-дзеня 1999 года.
Сёлета спаўняецца 15 год з таго дня, як пачалі сваю гісторыю органы і падраздзяленні па надзвычайных сітуацыях. За гэты час службай зроблена многае: удасканалена матэрыяльна-тэхнічная і вучэбна-трэніровачная базы, павысіўся прафесійны ўзровень і навыкі выратавальнікаў па ліквідацыі розных надзвычайных сітуацый.
Напярэдадні прафесійнага свята выратавальнікаў мы сустрэліся з начальнікам раённага аддзела па надзвычайных сітуацыях Дзмітрыем РОШЧЫНЫМ: — У кола абавязкаў нашай службы ўваходзіць любая сітуацыя, калі ёсць пагроза жыццю і здароўю чалавека. Спектр пажарных і аварыйна-выратавальных работ у нас даволі вялікі: ліквідацыя пажараў, выратаванне пацярпелых, лакалізацыя небяспечных для людзей, вытворчасці і навакольнага асяроддзя фактараў, разбор завалаў, нейтралізацыя ядавітых рэчываў і многае іншае. Не сакрэт, што многіх трагедый і катастроф удаецца  пазбегнуць толькі дзякуючы прафесійнаму майстэрству і зладжанасці ў рабоце выратавальнікаў. Яны штодзень знаходзяцца на дзяжурстве і гатовы ў любы час прыйсці на дапамогу тым, хто апынуўся ў бядзе.
Своечасова ліквідаваныя надзвычайныя сітуацыі і пажары ў жылых памяшканнях, вытворчых і грамадскіх будынках, лясах і на тарфяніках, выратаваныя з вогненнай стыхіі матэрыяльныя каштоўнасці і, самае   галоўнае, чалавечыя жыцці — усё гэта будні нашай службы.

Несумненна, галоўнае ў нашай рабоце — імгненная і правільная ацэнка надзвычайнай сітуацыі і адказнасць пры выкананні сваіх абавязкаў. Іншы раз, рашэнні даводзіцца прымаць літаральна за секунды, бо цана памылкі занадта высокая — жыццё чалавека.
На месцы здарэння кожны супрацоўнік без лішніх слоў ведае, што і як рабіць. Для гэтага мы пастаянна праводзім трэніроўкі, адпрацоўваючы  паводзіны ў экстрэмальных выпадках і тактыку дзеянняў, працуючы ў камандзе. Трэба адзначыць, што калектыў у нас згуртаваны і пры неабходнасці становіцца адзіным цэлым у барацьбе са стыхіяй.
Немалаважным станоўчым аспектам пры ліквідацыі надзвычайных сітуацый з’яўляецца забяспечанасць і ўкамплетаванасць тэхнічнымі сродкамі. Канешне, ні ў якое параўнанне не ідзе сучаснае абсталяванне выратавальнікаў з тым, што было прыкладана 10 год таму.
Зараз наш райаддзел укамплектаваны ўсім неабходным для правядзення аварыйна-выратавальных работ. Набыты гідраўлічна-выратавальны інструмент, які дазваляе нашым супрацоўнікам пры неабходнасці разразаць арматуру і метал, а таксама прыпадымаць цяжкія прадметы. Падчас пажару ў байцоў ёсць магчымасць зайсці ў моцна задымлены пакой і тым самым выратаваць жыццё чалавеку.
Час не стаіць на месцы, тэхніка і абсталяванне мадэрнізуюцца, удасканальваюцца. На баявым дзяжурстве штодзень у нас 5 укамплектаваных аўтамабіляў, якія пры неабходнасці імгненна гатовы выехаць на ўхіленне надзвычайнага здарэння.
Несумненна, як і ў любой прафесіі, у нашай галоўны фактар поспеху службы — работнікі. Калектыў у нас даволі малады, сярэдні ўзрост супрацоўнікаў — каля 30 гадоў. Ёсць і сямейныя дынастыі, і тыя, хто пасля выпрацоўкі неабходнага для пенсіі стажу застаецца і далей служыць на карысць абароны жыцця і здароўя грамадзян.
Наша штотыднёвая і галоўная задача — папярэджванне ўзнікнення пажараў і гібелі на іх людзей. Гэтую работу праводзім разам з аддзелам адукацыі, спорту і турызму райвыканкама, раённым цэнтрам сацыяльнага абслугоўвання насельніцтва, нагляднымі камісіямі пры сельскіх Саветах дэпутатаў і спецыялістамі ЖКГ.
Значную работу ў гэтым накірунку праводзяць інспектары Іван Мельнік і Вячаслаў Сідараў, а таксама начальнікі ПАВП Віктар Амельчанка, Валерый Шаболда, Расціслаў Свірыд і інш.
У бягучым годзе за ўзорнае выкананне службовых абавязкаў, высокія прафесіянальныя якасці граматамі Магілёўскага абласнога ўпраўлення МНС Рэспублікі Беларусь узнагароджаны начальнік каравула пажарнай аварайна-выратавальнай часці №1 Сяргей Архіпенка і старшы пажарны гэтай часці Алег Якушаў. Грашовымі прэміямі адзначана работа інспектара інспекцыі нагляда і прафілактыкі Івана Мельніка, старшыны групы матэрыяльна-тэхнічнага забеспячэння і абслугоўвання ПАВЧ№1 Уладзіміра Якаўлева, вадзіцеля ПАВП №12 Андрэя Аўдзеева, камандзіра аддзялення ПАВЧ №1 Алега Прусянкова, вадзіцеля ПАВП №11  Яўгена Хітракова, камандзіра аддзялення пажарнага ПАВЧ №1 Аляксандра Бараноўскага, старшага пажарнага ПАВЧ №1 Антона Русецкага.
Трэба адзначыць, у нашай службе выпадковых людзей не бывае. Тыя, хто прысвячае сябе нашай няпростай і мужнай прафесіі, павінны быць стрэсаўстойлівымі, рашучымі, гатовымі ў любую хвіліну рызыкаваць сабой для выратавання жыцця людзей.
Размаўляла
Людміла СЯМЁНАВА.