Стрыечныя браты Андрэй і Сяргей Дразды, якія працуюць у саставе маладзёжнага збожжаўборачнага экіпажа ААТ “Рассвет імя К.П.Арлоўскага”, дадатковага прадстаўлення не патрабуюць: не першы год і не першы раз падчас сёлетняга жніва яны становяцца яго героямі. Так, летась па выніках абласнога спаборніцтва за дасягненне высокіх паказчыкаў на ўборцы ўраджаю збожжавых і зернебабовых культур сярод маладзёжных экіпажаў браты Дразды сталі лідарамі. Падчас сёлетняй уборачнай першымі ў Магілёўскай вобласці дасягнулі тысячнага намалоту збожжа, а па стане на раніцу 11 жніўня – першымі ў нашым раёне перакрочылі рубеж у 2,5 тыс. т намалоту.

У гэты ж дзень з нагоды чарговай перамогі перадавых камбайнераў прыехалі павіншаваць старшыня райвыканкама Галіна Слабоднікава, намеснік старшыні райвыканкама Таццяна Бяляўская, старшыня райкама прафсаюза работнікаў АПК Віктар Ставер і дырэктар ААТ “Рассвет імя К.П.Арлоўскага” Аляксандр Багель.
Маладым камбайнерам уручылі Падзячныя пісьмы і каштоўныя падарункі. Галіна Слабоднікава павіншавала хлебаробаў з дасягнутымі высокімі рэзультатамі, адзначыўшы, што сваёй руплівай працай і намаганнямі яны ўносяць важкі ўклад не толькі ў развіццё гаспадаркі, на карысць якой шчыруюць, але і ў дабрабыт Кіраўшчыны, забеспячэнне харчовай бяспекі краіны.

Андрэй і Сяргей Дразды – прадстаўнікі дынастыі земляробаў. Іх бацькі – Мікалай Мікалаевіч і Анатоль Мікалаевіч – больш за тры дзясяткі год шчыруюць механізатарамі на карысць рассветаўскай гаспадаркі. Заўсёды на добрым рахунку, сваёй руплівай і добрасумленнай працай дасягаюць значных вышынь. Па іх прыкладзе пайшлі і сыны. Летась маладзёжнаму экіпажу Андрэя і Сяргея Драздоў перадалі камбайн “Джон-Дзір”, за штурвалам якога не адно жніво адпрацаваў знакаміты рассветаўскі механізатар Іван Салановіч. Менавіта на гэтым камбайне Іван Леанідавіч у свой час дасягаў найвышэйшых намалотаў у раёне. Маладыя земляробы, якім ён даверыў свайго стальнога сябра, не падвялі!

У гэты ж дзень ушанавалі яшчэ аднаго героя жніва з “Рассвета”: вадзіцель Сяргей Іваніцкі першым у раёне перавёз больш за 3 тыс. т свежанамалочанага збожжа. Перадавому вадзіцелю падзякавалі за яго працоўную стараннасць, дысцыплінаванасць і арганізаванасць. Пажадалі жыццёвай энергіі і новых працоўных дасягненняў на карысць нашага беларускага народа. За чарговае працоўнае дасягненне адзначылі Падзячным пісьмом і грашовай прэміяй.
Заслужаныя ўзнагароды – Падзячнае пісьмо райкама прафсаюза работнікаў АПК і каштоўны падарунак за 1000 т перавезенага збожжа – атрымаў і вадзіцель ААТ “Дабаснянскае” Мікалай Асташоў. Іх уручылі Віктар Ставер і Таццяна Бяляўская.

Днямі раней на рассветаўскія палеткі завіталі ганаровыя госці з абласнога цэнтра – першы сакратар Магілёўскага абласнога камітэта ГА “БРСМ” Уладзімір Паўлоўскі і загадчык аддзела праграмнай і арганізацыйна-кадравай работы абкама Алег Бойка, а таксама начальнік аддзела ідэалагічнай работы, культуры і па справах моладзі райвыканкама Ларыса Гаўрылава і першы сакратар РК ГА “БРСМ” Вікторыя Пяўнёва. У рамках рэспубліканскага праекта ГА “БРСМ” “Моладзь за ўраджай!” яны ўшанавалі маладзёжныя збожжаўборачныя экіпажы, якія дасягнулі найвышэйшых намалотаў: Андрэя і Сяргея Драздоў і Максіма Юркаўца і Івана Калеева з ААТ “Рассвет імя К.П.Арлоўскага”.
Уладзімір Паўлоўскі расказаў, што праект “Моладзь за ўражай!” рэалізуецца ўжо чацвёрты год. Яго асноўная мэта – падтрымаць маладых механізатараў і вадзіцеляў, якія старанна шчыруюць падчас уборкі ўраджаю.
Яўгенія БЯЛЬКО.
Фота Максіма МІКЕШЫНА.