У раёне пытанням добраўпарадкавання, стварэння камфортных умоў для пражывання надаецца значная ўвага.

Папулярным месцам наведвання жыхарамі Кіраўшчыны з’яўляецца зона адпачынку “Крынічка” ў раёне в.Пацава Слабада, дзе абсталяваны водасвятны комплекс св.Аляксандра Неўскага. Крыніца, купель і альтанка былі ўладкаваны тут у 2017 годзе, на гістарычным месцы: вадохрышчы былога мясцовага Нікольскага храма.
І днём, і ўвечары, а асабліва, у выхадныя дні на “Крынічцы” – шмат адпачываючых. Магчыма, таму што тут адчуваюцца цішыня і спакой, можна акунуцца ў сцюдзёную крынічную вадзічку, а таксама сярод спеваў птушак, квітнеючай зеляніны, пад чыстым блакітным небам адпачыць душой.

Комплекс быў узведзены намаганнямі мясцовай улады, працоўных калектываў арганізацый, прадпрыемстваў, устаноў Кіраўшчыны. І зараз ён не пакінуты без увагі: на яго тэрыторыі на пастаяннай аснове праводзяцца работы па добраўпарадкаванні, наладжваюцца суботнікі, каб падтрымліваць аб’ект у належным стане. Так, у мінулую пятніцу працоўны дэсант з ліку работнікаў райвыканкама, Цэнтра сацыяльнага абслугоўвання насельніцтва прыбралі альтанку, капліцу, купель. Прапалолі кветнікі, абкультурылі кустоўе, скасілі і вывезлі траву.
***
Многія жыхары раёна імкнуцца агарнуць сябе прыгажосцю не толькі на тэрыторыі ўласных домаўладанняў, але і на сваіх рабочых месцах, бо, калі чалавек прывык жыць у чысціні, дык і працаваць яму камфортней у такіх жа умовах. Прыклад таму – тэрыторыя малочна-таварнага комплексу “Валосавічы” ААТ “Рассвет імя К.П.Арлоўскага”, дзе акрамя належных санітарных умоў і парадку, пануе рознакаляровая прыгажосць ад вялікай колькасці кветак.
Восьмы год калектыў фермы ўзначальвае Любоў Азаранка. Калі жанчына прыйшла сюда працаваць, свабодная ад вытворчасці тэрыторыя была заса­джана газоннай травой. Любоў Іванаўна – вялікі аматар кветак – прапанавала калегам разбіць клумбы. Жанчына прызналася, што спачатку яе ініцыятыву падтрымалі нямногія, аднак, калі ўбачылі, што расліны – гэта сапраўдная радасць для душы, з інтарэсам падключыліся да агульнай справы. Зараз на клумбах МТК растуць розныя кветкі: ружы, лілеі, гладыёлусы…
У першы год Любоў Азаранка высаджвала на клумбах расліны з асабістага кветніку, які ў яе, да слова, таксама славіцца выключнай чысцінёй і вялікай колькасцю кветак, а зараз калегі самі дзеляцца насеннем і саджанцамі. Аднак высаджваць іх па-ранейшаму давяраюць толькі загадчыцы МТК. Для яе гэта – хобі і адпачынак для душы. Любоў Іванаўна рада, што такой цудоўнай і карыснай справай ёй удалося захапіць і калектыў комплексу.
***
Нагадваем, што кожную пятніцу ў нашым раёне наладжваецца адзіны санітарны дзень – калі членам працоўных калектываў варта выдзеліць час для навядзення санітарнага парадку і правядзення работ па добраўпарадкаванні вытворчых аб’ектаў, прылягаючых і замацаваных тэрыторый, двароў, паркаў і сквераў.
Бадай, кожнаму, хто неабыякава ставіцца да малой радзімы і грамадства, хочацца жыць, працаваць і адпачываць ва ўтульным і прыгожым горадзе ці вёсцы. Парадак і чысціня – наша агульная справа, якая павінна стаць стылем жыцця.
Падрыхтавала Яўгенія БЯЛЬКО.
Фота Максіма МІКЕШЫНА.