Які ён, наш горад? Ці ёсць у вас у Кіраўску месцы, па якіх вы можаце прайсціся без шума, дзе птушкі спяваюць на дрэвах, а свежае паветра напаўняе лёгкія?.. Хто з нас не адчувае сябе лепш пасля прагулкі ў парку ці кароткага адпачынку на лаўцы пад кронамі дрэў? Сонечныя прамяні, якія прабіваюцца скрозь лісце, напаўняюць нас энергіяй, а свежае паветра дорыць яснасць думак. Даказана, што прысутнасць расліннасці садзейнічае зніжэнню стрэсу, паляпшэнню канцэнтрацыі і нават павышае настрой. Здаецца, што кожны крануты зелянінай куток – астравок спакою і гармоніі.

У апошнія гады я з задавальненнем назіраю, як вуліцы нашага горада зменьваюцца, работы па азеляненні набываюць усё большыя маштабы.
У райцэнтры з’явіліся арыгінальныя зялёныя і кветкавыя зоны, куткі з дэкаратыўнымі раслінамі, алеі. Яны ўносяць яркія ноты ў палітру гарадскога жыцця, упрыгожваючы прастору і напаўняючы яе свежасцю.

Работы па азеляненні ў райцэнтры вядуцца пад чулым кіраўніцтвам майстра па добраўпарадкаванні Кіраўскага УКП «Жылкамгас» Ганны Камінскай. Распрацаваны план пасадак, які накіраваны на змяненне аблічча нашага горада.
Кветкавыя кампазіцыі, створаныя з яркіх петуній, далікатнай бягоніі і сонечных аксамітаў, цешаць вока і паднімаюць настрой.

На вуліцах Кіраўска красуюцца туі, ядловец, елкі. Вылучаецца клён стракалісты на вуліцы Гагарына, які сваім яркім і незвычайным выглядам прыцягвае ўвагу.
У гарадскім парку высаджана некалькі тэматычных алей. Ёсць алея, прысвечаная Году міра і стварэння. У гонар 20-гадовага юбілею Кіраўска з’явілася алея «Адзінства». Ёсць сямейныя алеі, прысвечаныя працы, сяброўству, і іншыя.

Азеляненне гарадской прасторы – не толькі эстэтычнае добраўпарадкаванне, а яшчэ і важная акалічнасць для здароўя. Зносіны з прыродай і прыгажосць, што вакол нас, дапамагаюць на час забыцца аб клопатах і атрымаць асалоду ад спакою, неверагодны зарад энергіі і сіл.
Акрамя таго, зялёныя зоны адыгрываюць важную ролю ў паляпшэнні экалагічнага становішча. Яны затрымліваюць пыл і забруджвальныя рэчывы, вылучаюць кісларод і з’яўляюцца натуральнымі фільтрамі паветра. Кожнае новае дрэва, кожная квітнеючая расліна – крок да больш здаровай экалогіі.

Наша агульная задача – клопат аб тым, што мы ўжо маем. Стварэнне і падтрыманне ў парадку зялёных зон патрабуе ўвагі і намаганняў. Давайце імкнуцца да таго, каб наш горад быў не проста месцам, дзе мы працуем і жывём, але і прасторай, дзе расце жыццё і квітнее прырода. Кожны з нас можа ўнесці свой уклад – няхай гэта будзе клопат аб двары, у якім жывеш, удзел у акцыях па азеляненні альбо проста пазітыўнае стаўленне да зялёных насаджэнняў вакол.

Яўгенія БЯЛЬКО.