Кіраўчане і жыхары сельскіх населеных пунктаў добра ведаюць першага намесніка начальніка аддзела ўнутраных спраў райвыканкама, падпалкоўніка міліцыі, дэпутата раённага Савета дэпутатаў Віктара Кузьменку. 16 год ён служыць у РАУС, добрасумленна выконваў свае абавязкі на розных пасадах, заваяваў аўтарытэт сярод калег, выбаршчыкаў за высокія прафесійныя і чалавечыя якасці, актыўную грамадзянскую пазіцыю, уменне выслухаць людзей і пайсці насустрач у вырашэнні іх праблем.

Віктар Мікалаевіч у ліку іншых прадстаўнікоў раёна абраны дэлегатам VI Усебеларускага народнага сходу.
У нашай размове Віктар Кузьменка адзначыў, што ў мерапрыемстве такога высокага ўзроўню будзе прымаць удзел упершыню. Яму вельмі прыемна за аказаны давер. Гэта дарагога каштуе, падкрэсліў дэлегат, але і да многага абавязвае, бо на прадстаячым народным сходзе яго ўдзельнікам прадстаіць на падставе дасягнутага нашай краінай за мінулую пяцігодку вызначыць вектар сацыяльна-эканамічнага развіцця Беларусі на бліжэйшую будучыню. На абмеркаванне будуць вынесены і накірункі грамадска-палітычнага развіцця краіны.
– Безумоўна, як прадстаўніку сілавых структур, для мяне вельмі важныя пытанні падтрымання грамадскай бяспекі, стабільнасці ў краіне – працягваў нашу размову Віктар Кузьменка. – Для ўпэўненага руху наперад нам трэба быць адзінымі ў захаванні парадку і спакою ў Беларусі.
Адна з актуальных задач – стабіліза­ваць няпростую сітуацыю ў грамадстве. У паслявыбарны перыяд мы сутыкнуліся з новай з’явай – уплывам на насельніцтва, у асноўным маладога, інтэрнэт-прасторы – тэлеграм-каналаў, сацсетак, што прывяло да пратэстных акцый, раз’яднання грамадства. Трэба рабіць усё магчымае для выпраўлення становішча, каб мэсэнджэры і “эфект натоўпу” не ўплывалі на фарміраванне меркаванняў маладых людзей, бо за імі – будучыня краіны.
Для ўсіх, хто жадае быць пачутым па пытаннях развіцця рэспублікі і іншых, у тым ліку ў нашым раёне, працуюць дыялогавыя пляцоўкі, грамадскія прыёмныя: кожны можа выказаць свае думкі, унесці прапановы. Гэтую магчымасць многія прадстаўнікі розных слаёў грамадства і сфер дзейнасці – і прадпрымальнікі, і моладзь, і пенсіянеры, і іншыя – выкарысталі і выкарыстоўваюць. Прапановы былі ўлічаны, унесены для фарміравання арыенціраў на пяцігодку.
Лічу, што адзін са шляхоў барацьбы за дзіцячыя душы – удасканаленне ваенна-патрыятычнага выхавання. Многае робіцца ў гэтым накірунку, але нешта і ўпушчана. У сілу спецыфікі работы мне блізкі блок праекта Праграмы сацыяльна-эканамічнага развіцця на наступную пяцігодку, які тычыцца сям’і. Я глыбока ўпэўнены, што менавіта тут павінна пачынацца патрыятычнае выхаванне дзяцей, а далей, у школе – працягвацца. Па сабе памятаю, што ў юнацкім узросце нам, хлопцам, падабаліся заняткі па пачатковай ваеннай падрыхтоўцы: яны выклікалі цікавасць да гісторыі Беларусі, злучалі, умацоўвалі сяброўства, выхоўвалі мужчынскія якасці, у тым ліку адказнасць за свае ўчынкі. Я цалкам згодны з прапановамі, якія зараз выказваюцца, аб ўвядзенні ва ўстановах адукацыі пасады кіраўніка па ваенна-патрыятычным выхаванні.
Важна даць падлеткам і моладзі зразумець, што любую інфармацыю трэба ўмець аналізаваць, а не верыць безаглядна тэлеграм-каналам. Гэта я аргументавана растлумачыў сваім дзецям, і яны мяне зразумелі. Трэба даносіць інфармацыю і з існуючага заканадаўства, якое дакладна трактуе адказнасць за незаконныя дзеянні, якімі з’яўляюцца пратэстныя акцыі.
Думаю, кожнага з нас не можа не хваляваць дэмаграфічная сітуацыя ў краіне. Таму палітыка дзяржавы, і гэта прапісана ў праекце Праграмы на наступную пяцігодку, накіравана на вырашэнне задачы стабілізацыі колькасці насельніцтва і стварэнне ўмоў для далейшага яе росту. Гэта і падтрымка традыцыйных сямейных каштоўнасцей, і далейшая дапамога мнагадзетным сем’ям, і іншыя напрамкі.
Суб’ектамі прафілактыкі нашага раёна ў межах павышэння дэмаграфічнай бяспекі арганізавана сістэмная работа, накіраваная на папярэджванне гібелі людзей ад знешніх фактараў, прычын і ўмоў, ім спрыяючых. Дарэчы, на нядаўнім пасяджэнні райвыканкама вялася канструктыўная размова па гэтай тэме, вызначаны актуальныя задачы па ўдасканаленні работы, у тым ліку перад праваахоўчымі органамі.
– Віктар Мікалаевіч, Вы з’яўляецеся дэпутатам раённага Савета дэпутатаў ужо другога склікання. Гэта сведчыць пра давер кіраўчан, улічваючы, што выбары ў мясцовыя Саветы былі на альтэрнатыўнай аснове. Як будуецца Ваша дэпутацкая дзейнасць, што Вы лічыце ў ёй галоўным?
– Дэпутатам абраны па Кіраўскай выбарчай акрузе №8, а гэта больш за 400 выбаршчыкаў-гараджан з вуліц Міру, частак Церашковай, Кірава, завулкаў Церашковай. Ёсць такая адметнасць, што людзі ў асноўным звяртаюцца да мяне з пытаннямі, якія датычацца маёй прафесійнай дзейнасці як прадстаўніка праваахоўчых органаў. Стараюся іх зразумець, дапамагчы.
З’яўляюся членам прэзідыума раённага Савета дэпутатаў, узначальваю пастаянную камісію па пытаннях законнасці, захавання правоў і свабод грамадзян.
Лічу, што ў Беларусі, у тым ліку ў нашым раёне, на высокім узроўні наладжана работа са зваротамі грамадзян: яе рэгламентуюць адпаведныя Законы “Аб зваротах грамадзян і юрыдычных асоб”, “Аб асновах адміністрацыйных працэдур”, створана дакладная сістэма ў гэтым плане. Можна звярнуцца з праблемамі і цікавячымі пытаннямі на “прамыя тэлефонныя лініі”, прыйсці на прыём да кіраўніцтва райвыканкама, на сустрэчы з жыхарамі населеных пунктаў, якія на пастаяннай аснове праводзяцца кіраўніцтвам раённай улады з удзелам дэпутатаў, прадстаўнікоў службаў, якія адказваюць за жыццядзейнасць насельніцтва, і атрымаць адказ, аператыўнае рэагаванне на зварот непасрэдна “з першых вуснаў” па любым накірунку дзейнасці. Таму менш зваротаў непасрэдна да дэпутатаў.
Бывае, да мяне звяртаюцца пажылыя людзі, у якіх дарослыя, па 35-45 год, сын ці дачка не жадаюць працаваць, харчуюцца, п’янствуюць, “прысмактаўшыся” да бацькоўскай пенсіі. Па заканадаўству да адказнасці іх не прыцягнеш: у грамадскіх месцах не бываюць, не дэбашыраць. Праводжу з імі прафілактычную работу, даю рэкамендацыі, адна з якіх – кадзіравацца. Калі зусім не жадаюць разумець парад, пачынаем працаваць па накіраванні грама­дзяніна ці грамадзянкі ў лячэбна-працоўны прафілакторый.
Бывае, кіраўчане звяртаюцца з бытавымі праблемамі: не могуць па­дзя­ліць спадчыну пасля смерці бацькоў – маўляў, прыходжу ў кватэру, а брат не аддае патрэбную рэч, а яе мама падарыла. Растлу­мачваю: ці самім трэба мірна дамовіцца па гэтым пытанні, ці звяртацца ў суд.
З выбаршчыкамі працую таксама па пытаннях арганізацыі навядзення парадку і добраўпарадкавання дваравых і прыдамавых тэрыторый.
– Наколькі я ведаю, рэзультаты работы Кіраўскага РАУС за мінулы год даволі паспяховыя, у чым, зразумела, непасрэдная заслуга ўмелага кіраўніцтва аддзелам: дакладная пастаноўка задач перад асабовым саставам, вызначэнне эфектыўных напрамкаў іх вырашэння…
– У параўнанні з 2019 годам значна знізілася злачыннасць на тэрыторыі раёна. Зменшылася і колькасць правапарушэнняў.
Паколькі шмат часу я працаваў у аддзяленні ДАІ РАУС і ўзначальваў яго, прыемна канстатаваць, што 2020 год за мінулыя два дзесяцігоддзі стаў першым, калі ў дарожна-транспартных здарэннях не загінула ніводнага чалавека. Менш было ДТЗ, колькасць пацярпеўшых, цяжкасць наступстваў. Зразумела, гэта ўплыў многіх фактараў, але значная роля і работы праваахоўчых органаў.
Час дыктуе новыя ўмовы. У адпаведнасці з імі, лічыць дэлегат VI Усебеларускага народнага сходу Віктар Кузьменка, і будуць вызначаны шляхі развіцця краіны на новую пяцігодку. І паўтарыў, што галоўнае ў дасягненні любых мэт – адзінства нашага народа.

Мы прапанавалі выбаршчыкам, пражываючым на тэрыторыі Кіраўскай выбарчай акругі №8, ахарактарызаваць Віктара Кузьменку як дэпутата.

Сяргей МАКСІМЕНКА, старшыня Кіраўскай МРАС ДТСААФ (пражывае ў д.№5 па вул. Міру): “Ведаю Віктара Мікалаевіча яшчэ па мінулай сумеснай службе ў РАУС. Гэта граматны, прынцыповы, справядлівы, паслядоўны ў сваіх думках і рашэннях чалавек. Ён уносіць значны ўклад у тое, каб на тэрыторыі раёна ўмацоўваўся правапарадак.
Наш дэпутат мае актыўную пазіцыю па жыцці, займаецца грамадскай работай. І з выбаршчыкамі заўсёды знаходзіць агульную мову: ці трэба нейкія парады даць па прававых, іншых пытаннях, ці правесці гутарку пра неабходнасць навядзення парадку, ці арганізаваць канкрэтнае мерапрыемства ў гэтым напрамку. Так было і ў межах падрыхтоўкі да раённага свята працаўнікоў вёскі “Дажынкі”, якое праводзілася ў Кіраўску два гады запар”.
Аляксандр БУДНІЦКІ, вадзіцель аўтапарка №14 (пражывае ў д.№19 па вул.Церашковай): “Падчас выбараў у мясцовыя Саветы дэпутатаў я ніколькі не сумняваўся, аддаючы свой голас за Віктара Мікалаевіча. Ён – сапраўдны афіцэр і чалавек добры. У яго справядлівасці, адказнасці, павазе да людзей, гатоўнасці прыйсці ім на дапамогу мы пераканаліся, калі ён быў дэпутатам папярэдняга склікання. І зараз мы давяраем яму і лічым, што яго заслужана абралі дэлегатам VI Усебеларускага народнага сходу”.

Наталля ХАДАКОВА.

Фота Максіма МіКЕШЫНА.

Подписывайтесь на нас в социальных сетях: «Одноклассники» и «Одноклассники» (группа), «ВКонтакте», «Фейсбук», «Instagram», «Telegram», «Яндекс Дзен».