“Традыцыі беларускага народа: шлях праз стагоддзі. Захаванне і развіццё нацыянальнай культуры ў Рэспубліцы Беларусь” — такой была асноўная тэма кастрычніцкага Адзінага дня інфармавання. Разам з ёй падчас выезду інфармацыйна-прапагандысцкіх груп у працоўныя калектывы, сустрэч з насельніцтвам па месцы жыхарства былі таксама абмеркаваны праблемы вытворчага траўматызму і аховы працы ў Магілёўскай вобласці і нашым раёне, пытанні папарэджвання пажараў і гібелі лю­дзей ад іх у асенне-зімовы перыяд, бяспекі дзяцей, ход рэспубліканскай акцыі “За бяспеку разам!”.

З прадстаўнікамі калектываў Цэнтра культуры і вольнага часу, раённай бібліятэкі, дзіцячай школы мастацтваў г.Кіраўска, рэдакцыі раённай газеты “Кіравец”, райкама ГА “БРСМ” сустрэлася член інфармацыйна-прапагандысцкай групы Магілёўскага аблвыканкама, начальнік упраўлення па рабоце са сродкамі масавай інфармацыі і маладзёжнай палітыкі галоўнага ўпраўлення ідэалагічнай работы і па справах моладзі аблвыканкама Алена Дзівакова.
Сустрэча пачалася з прыемнай падзеі — уручэння Ганаровых грамат упраўлення культуры Магілёўскага аблвыканкама за шматгадовую добрасумленную працу, высокія творчыя паказчыкі ў рабоце і ў сувязі з прафесійным святам педагогу харавых дысцыплін дзіцячай школы мастацтваў г.Кіраўска Святлане Шакаравай, настаўнікам мастацкіх дысцыплін Жанне Сілінай з Жыліцкай ДШМ, Наталлі Рублеўскай з філіяла аг.Мышкавічы ДШМ г.Кіраўска.
Алена Дзівакова адзначыла плённую творчую дзейнасць работнікаў культуры краіны, накіраваную на захаванне нацыянальнай спадчыны, папулярызацыю культурных каштоўнасцей, на тое, каб несці ў душы людзей радасць, дарыць
ім свята, і выказала шчырую ўдзячнасць за ўклад прадстаўнікоў галіны культуры Кіраўшчыны ў гэтую справу.
Працягваючы тэму, Алена Рыгораўна падкрэсліла, што культура — гэта складаная, шматгранная з’ява, якая закранае ўсе сферы жыццядзейнасці грамадства і чалавека. Яна — аснова духоўна-маральных арыенціраў, нацыянальнай самасвядомасці і патрыятызму грамадзян.
Госця закцэнтавала ўвагу прысутных на асаблівасцях развіцця сацыякультурнай сферы ў нашым стагоддзі, якія, у першую чаргу, трэба ўлічваць тым, хто працуе ў дадзенай галіне.
Гаворачы аб галоўных накірунках палітыкі Беларусі ў сферы культуры, Алена Дзівакова нагадала асноватворныя дакументы — Кодэкс Рэспублікі Беларусь аб культуры і Дзяржаўную праграму “Культура Беларусі”, якая распрацоўваецца на пяць год.
У цэнтры асаблівай увагі — Рэспубліканская праграма мерапрыемстваў па правядзенні ў Беларусі 2018-2020 гадоў пад знакам Года малой радзімы.
Было адзначана, што ў нашай рэспубліцы ўстаноўлены нарматыў расходаў на культуру за кошт бюджэтнага фінансавання ў разліку на аднаго жыхара — 1,3 базавай велічыні, і штогод гэты паказчык перавыконваецца. У першым паўгоддзі бягучага года ён склаў 2 б.в. Адметна, што больш за ўсё бюджэтных сродкаў у разліку на аднаго жыхара накіравана на развіццё культуры ў Магілёўскай вобласці —
3 б.в.
Член інфармацыйнай групы аблвыканкама спынілася на колькасным саставе работнікаў устаноў культуры вобласці, сістэме падрыхтоўкі кадраў.
Размова таксама ішла пра знакавыя сацыяльна-культурныя праекты рэспубліканскага і абласнога ўзроўняў.
На тэрыторыі Магілёўшчыны праводзіцца больш 20 міжнародных, рэспубліканскіх і рэгіянальных фестываляў, конкурсаў і святаў мастацкай самадзейнай творчасці. Варта нагадаць Міжнародны музычны фестываль «Залаты шлягер», Міжнародны тэатральны форум «M@rt.контакт», Міжнародны фестываль дзіцячай творчасці “Залатая пчолка” ў Клімавічах, Рэспубліканскае свята “Купалле” (“Александрыя збірае сяброў”) у Шклоўскім раёне, Міжнародны пленэр па мастацтву “Вобраз Радзімы ў выяўленчым мастацтве” і іншыя.
Практычна кожны рэгіён Прыдняпроўскага краю, падкрэсліла Алена Дзівакова, мае свой асаблівы фестываль ці свята.
Яна адзначыла плённую работу ў сферы культуры па шматлікіх напрамках: захаванне, развіццё, распаўсюджванне, папулярызацыя беларускай нацыянальнай культуры і мовы, кнігадрукаванне, сцэнічнае мастацтва, музейная справа, кінематаграфія, ахова беларускай гісторыка-культурнай спадчыны (у тым ліку правядзенне рэстаўрацыйных мерапрыемстваў па аднаўленні Жыліцкага палацава-паркавага ансамбля) і іншых.
Увага ў ходзе сустрэчы была нада­дзена рабоце з творчай моладдзю.
Прадстаўнік аблвыканкама адказала на пытанні прысутных.