На ключавых аспектах Паслання Прэзідэнта Рэспублікі Беларусь беларускаму народу і Нацыянальнаму сходу Рэспублікі Беларусь — асноўнай тэме майскага Адзінага дня інфармавання — закцэнтавалі ўвагу прысутных члены інфармацыйна-прапагандысцкіх груп, выступаючы ў працоўных калектывах і па месцы жыхарства насельніцтва.

Было, у прыватнасці, пад­крэслена, што змест Паслання Кіраўніка дзяржавы сёлета ў тым ліку вызначаўся зыхо­дзячы з аналізу зваротаў, якія паступілі перад “Вялікай размовай з Прэзідэнтам” 1 сакавіка гэтага года. Кожны са зваротаў быў карпатліва вывучаны і прапрацаваны.
Удзельнікам сустрэч нагадалі асноўныя тэматычныя блокі Паслання: нацыянальная эканоміка (прамысловы комплекс, развіццё малога і сярэдняга бізнесу, IT-галіна, гандаль і экспарт, аграпрамысловы комплекс, даходы насельніцтва і цэнавая палітыка, занятасць насельніцтва); развіццё і добраўпарадкаванне рэгіёнаў; дзяржаўная кадравая палітыка; сацыяльная палітыка (сістэма адукацыі, дэмаграфічная сітуацыя, ахова здароўя, спорт і турызм); міжнароднае становішча; нацыянальная бяспека; барацьба са злачыннасцю, правапарушэннямі і карупцыяй; аб змяненні Канстытуцыі і прадстаячых выбарчых кампаніях.

Члены інфармацыйна-прапагандысцкіх груп спыніліся на аспектах кожнага з гэтых блокаў і задачах, вызначаных Кіраўніком дзяржавы, зыхо­дзячы з таго, што на сённяшні дзень галоўнымі прыярытэтамі развіцця беларускай дзяржавы з’яўляюцца дабрабыт народа, міралюбівая знешняя палітыка, нацыянальная бяспека.
Падчас Адзінага дня інфармавання былі таксама абмеркаваны пытанні: “Аб правя­дзенні перапісу насельніцтва Рэспублікі Беларусь”, “Правілы захоўваем — жыццё зберагаем!”, “Папярэджванне лясных пажараў. Бяспека жыцця і здароўя дзяцей”.
Падчас правядзення чарговага Адзінага дня інфармавання члены абласной інфармацыйна-прапагандысцкай групы аблвыканкама, у якую ўвайшлі старшыня камітэта па працы, занятасці і сацыяльнай абароне аблвыканкама Святлана Тарасенка і першы намеснік начальніка абласнога ўпраўлення МНС Дзмітрый Лакіза сустрэліся з калектывам КУП “Кіраўскія бытпаслугі”.
Былі абмеркаваны тэмы Адзінага дня інфармавання, затым адбылася размова па актуальных пытаннях, сярод якіх: сацыяльная абарона грамадзян розных узроставых груп, захаванне бяспекі жыцця і здароўя людзей.
У сваім выступленні Святлана Тарасенка асаблівую ўвагу надала сацыяльнай падтрымцы насельніцтва з боку дзяржавы. Галоўныя пункты, на якіх яна спынілася, тычыліся падтрымкі сем’яў з дзецьмі, налічэння сямейнага капіталу і павышэння прэстыжу сям’і, у тым ліку праз узнагароджванне жанчын, якія нарадзілі 5 і больш дзяцей, ордэнам Маці. Дарэчы, у нашым раёне гэтай высокай дзяржаўнай узнагароды ўдастоены 32 жанчыны.
Па словах прамоўцы, маці і дзеці — катэгорыі насельніцтва, якія маюць патрэбу ў асаблівых падтрымцы і клопаце з боку дзяржавы, менавіта ад іх залежаць будучыня краіны, яе дэмаграфічная бяспека, працоўны патэнцыял. Яна нагадала, што ў Беларусі прадпрымаюцца беспрэцэдэнтныя меры па падтрымцы сем’яў з дзецьмі. Дзякуючы гэтаму з кожным годам у нашай краіне павялічваецца колькасць мнагадзетных сем’яў.

Не была абыдзена Святланай Тарасенка і тэма пенсіённага забеспячэння грамадзян, сацыяльнай абароны адзінокіх людзей, інвалідаў.
Дзмітрый Лакіза расказаў пра становішча з пажарамі ў раёне і вобласці, прывёў прыклады найбольш трагічных надзвычайных сітуацый з гібеллю людзей, жыццёвыя трагедыі, у выніку якіх загінулі дзеці.
Удзельнікі Адзінага дня інфармавання паглядзелі фільм аб вогненных трагедыях, дзе ахварямі сталі дзеці і атрымалі ад выратавальнікаў памяткі з алгарытмам дзеяння ў надзвычайных сітуацыях.
Бяспека жыцця і здароўя дзяцей стала асаблівай тэмай сустрэчы. Хутка пачынаюцца летнія канікулы, у хлопчыкаў і дзяўчынак з’явіцца шмат вольнага часу, і вельмі важна, адзначыў прадстаўнік МНС вобласці, каб выкарыстаны ён быў з карысцю. Для бацькоў павінна стаць прапісной ісцінай разуменне поўнай адказнасці за бяспеку сваіх дзяцей, захаванне іх жыцця.
Святлана Тарасенка і Дзмітрый Лакіза пазнаёміліся з вытворчай базай КУП “Кіраўскія бытпаслугі”, умовамі працы работнікаў, пацікавіліся прадастаўляемымі насельніцтву паслугамі.