Дэлегацыя нашага раёна прысутнічала на ўрачыстым мерапрыемстве, прысвечаным 100-годдзю ЛКСМБ, якое адбылося 23 верасня ў Магілёве.

На сустрэчы, якая прайшла ў Магілёўскім дзяржаўным універсітэце імя А.А.Куляшова, было больш за 100 чалавек з усёй вобласці, у тым ліку ветэраны камсамольскага руху Кіраўшчыны Любоў Лазаковіч і Галіна Спірыдонава, намеснік дырэктара ААТ “Рассвет імя К.П.Арлоўскага” Наталля Шапавалава, першы сакратар РК ГА “БРСМ” Алена Осіпава, прадстаўнікі моладзі КСУП “Чырвоны баец” Анатаніна Сідарэнка, Валерыя Іваніцкая, камандзір студэнцкага сэрвіснага атрада імя Героя Савецкага Саюза Е.У.Дабравольскага Анастасія Савельева, атрад улетку дзейнічаў на базе ЗТАА “Кіраўскі харчовы камбінат”.
“Дыялог пакаленняў” стаў камунікатыўнай пляцоўкай, дзе моладзь і старэйшае пакаленне агучылі пытанні і праблемы, якія тычацца маладзёжнай тэматыкі, а таксама прапаноўвалі шляхі іх вырашэння.
Затым адбыўся канцэрт і ўзнагароджанне пераможцаў абласнога этапу “Працоўнага семестра-2020”. У намінацыі “Лепшая прымаючая арганізацыя” пераможцам прызнаны ААТ “Рассвет імя К.П.Арлоўскага”; у намінацыі “Лепшы сэрвісны атрад” перамогу святкаваў атрад імя Героя Савецкага Саюза Е.У.Дабравольскага.
Любоў Лазаковіч адзначыла, што ёй было вельмі прыемна прымаць удзел ва ўрачыстасці. З’явілася магчымасць у чарговы раз успомніць гады юнацтва і паразважаць над тым, чаму навучыў камсамольскі рух. “Для мяне заўсёды шчасце – сустракацца з маладзёжнай аўдыторыяй, – расказала Любоў Пятроўна. – Хочацца, каб юнакі і дзяўчаты ведалі гісторыю маладзёжнага руху ў Беларусі. Азіраючыся назад, у сваё юнацтва, я разумею, што камсамол навучыў мяне непахісным прынцыпам і ідэалам, якія я пранесла праз усё жыццё. Па-першае, брацца за любую справу з душой, з думкай: трэба –значыць, трэба, не разважаючы, якія матэрыяльныя выгоды я буду мець; па-другое, рабіць правільны выбар; трэцяе – на раўных размаўляць з аднадумцамі, не баяцца выказваць свае думкі і адстойваць сваю пазіцыю; і чацвёртае – умець правільна, дакладна працаваць з дакументамі.
Я разумею, што час зараз іншы, моладзь іншая, а, значыць, павінны быць і іншыя падыходы ў рабоце з ёй. Аднак, лічу, што прынцыпы маладзёжнага братэрства, моцнага сяброўства і шчырай узаемавыручкі будуць актуальнымі ў любы час”.