У першую нядзелю чэрвеня сваё прафесійнае свята адзначаюць меліяратары. Менавіта прадстаўнікі гэтай прафесіі працуюць над паляпшэннем гідралагічных, глебавых і агракліматычных умоў з мэтай павышэння эфектыўнасці выкарыстання зямельных і водных рэсурсаў краіны.
Напярэдадні прафесійнага свята мы сустрэліся з дырэктарам ААТ “ПМК-97 Вадбуд” Аляксандрам Вербінавым і галоўным інжынерам Ганнай Ходасавай, каб даведацца, чым сёння жывуць меліяратары, над чым працуюць і да чаго імкнуцца:

— Галоўным накірункам нашай дзейнасці застаецца аднаўленне меліярацыйных зямель, а таксама рамонтна-эксплуатацыйныя работы, тэхнічны догляд і рэканструкцыя меліярацыйных сістэм. У мінулым годзе было выканана падрадных работ больш чым на 15 млрд. руб: тэмп росту да ўзроўню 2013 г. склаў 163,4%.
Асноўную стаўку ў рабоце робім на выкананне мерапрыемстваў згодна “Праграмы захавання і выкарыстання дзяржаўных меліяраваных земляў на 2011-2015 г.г.”: у мінулым годзе прадпрыемства поўнасцю выканала даведзены план. Была праведзена рэканструкцыя меліярацыйных сістэм “Дабрыца” — участка “Асаўнік” у СВК “Добасна-агра”, “Добасна” ў СВК “Бераснёўскі” і “Кострычка” ў РАПТЗ, гэта дазволіла ўвесці ў севазварот гаспадарак больш за 280 га земляў. На гэтых плошчах праводзіліся ачыстка і рамонт існуючых каналаў, выкарчоўвалася кустоўе, аднаўлялася дрэнажная сетка, а пры неабходнасці пракладвалася новая. Акрамя таго, у СВК “Рассвет” імя К.П.Арлоўскага і СВК “Калгас “Свярдлова” ажыццявілі аграмеліярацыйныя мера-прыемствы. Тут было праведзена выдаленне кус-тоўя, хмызняку, збор камення, зроблены адвод лішкаў вільгаці з паверхневага і ворыўнага слою глебы, стварэнне неабходных дадатковых запасаў вільгаці ў глебе. Па сутнасці, меліяратары вярнулі гаспадаркам 160 га земляў у стане, прыгодным для вырошчвання сельскагаспадарчых культур.
Зараз працуем на рэканструкцыі меліярацыйный сістэмы ў в.Хвайніца: калі работы будуць завершаны, СВК “Калгас “Беларусь” атрымае дадаткова ў сваё карыстанне больш за 100 га адроджаных земляў. Раней намі тут ужо быў здадзены ўчастак на 160 га.
Займаемся падчысткай і абкашваннем меліярацыйных каналаў, аднаўленнем і прамыўкай дрэнажных сетак, рамонтам тэхнічных збудаванняў, праводзім комплекс работ па падтрыманні ў належным стане дзеючых меліярацыйных сістэм раёна.
Кола нашай дзейнасці — не толькі рамонтна-эксплуатацыйныя работы: аказваем дапамогу сельскагаспадарчым арганізацыям раёна падчас правядзення палявых работ, добраўпарадкоўваем населеныя пункты, праводзім бетонныя работы і інш. У СВК “Добасна-агра” працавалі на будаўніцтве і рэканструкцыі МТФ «Добасна».
У бягучым годзе скарацілася колькасць бюджэтных сродкаў, выдзяляемых на выкананне праграмы захавання і выкарыстанне меліяраваных земляў, таму адшукваем аб’ёмы работ у іншых раёнах. Зараз, напрыклад, праводзім рэканструкцыю меліярацыйных сістэм на аб’ектах Быхаўскага раёна.
Работы нямала, і, як вядома, поспех любой справы ў многім залежыць ад згуртаванасці калектыву: у гэтым сэнсе нам пашанцавала. На прадпрыемстве працуюць сапраўдныя прафесіяналы: у многіх работ-нікаў — больш за дваццаць гадоў працоўнага стажу. Выдатна выконваюць свае абавязкі трактарысты Мсціслаў Лукашэнка, Аляксандр Мацукоў і Юрый Амбрасёнак. Адказнасць і працавітасць вызначаюць Аляксандра Хапанцава, Ула-дзіміра Русецкага, Сяргея Русецкага, Фёдара Баранчука. Прафесіяналамі сваёй справы можна назваць будаўнікоў Мікалая Фядотава, Мікалая Капусту, Сяргея Янчанку, Сяргея і Васіля Белаглазавых.
Ніхто не стане сумнявацца ў важнасці і неабходнасці работы меліяратараў у нашым раёне, дзе большасць сельскагаспадарчых угоддзяў — гэта асушаныя калісьці землі, якія неабходна падтрымліваць у належным стане, каб яны маглі прыносіць карысць аграрыям.
Запісала
Людміла СЯМЁНАВА.