З 7 лютага 2017 года Аляксандр Якаўлевіч Адамаў, які працаваў першым намеснікам старшыні Кіраўскага райвыканкама, начальнікам упраўлення сельскай гаспадаркі і харчавання, пераведзены на пасаду намесніка старшыні камітэта па сельскай гаспадарцы і харчаванні (курыруючага пытанні механізацыі) Магілёўскага аблвыканкама.
У мінулы панядзелак на пасяджэнні райвыканкама кіраўнік раёна Аляксандр Бутараў адзначыў, што за той перыяд, які Аляксандр Адамаў працаваў на Кіраўшчыне, ён зарэкамендаваў сябе граматным, адказным спецыялістам і ўнёс важкі ўклад у дасягненне раёнам дастойных паказчыкаў у сельскагаспадарчай галіне. Аляксандр Бутараў уручыў Аляксандру Адамаву Падзячнае пісьмо райвыканкама.
Старшыня райсавета дэпутатаў Галіна Слабоднікава ўручыла яму Падзячнае пісьмо раённага Савета дэпутатаў за добрасумленную працу і асабісты ўклад у работу па навядзенні парадку на зямлі.
Ад імя кіраўнікоў сельгасарганізацый удзячнасць за сумесную плённую работу выказаў Аляксандру Адамаву дырэктар ААТ “Рассвет” імя К.П.Арлоўскага Аляксандр Багель і пажадаў працоўных поспехаў на новай пасадзе.
У сваю чаргу Аляксандр Адамаў звярнуўся да кіраўніка раёна і прысутных са словамі падзякі за разуменне, падтрымку ў рабоце, што дапамагала на належным узроўні забяспечваць імідж Кіраўскага раёна ў вобласці і рэспубліцы.