Старшы следчы Максім Дудзінскі прыйшоў на службу ў раённы аддзел Следчага камітэта Рэспублікі Беларусь з пачатку яго дзейнасці — у студзені 2012 года. Да гэтага моманту ён адтачваў сваё прафесійнае майстэрства ў раённым аддзеле ўнутраных спраў.

Пасля заканчэння Дабаснянскай СШ Максім Аляксандравіч атрымаў спецыяльнасць юрыста на факультэце правазнаўства Акадэміі МУС. Малады і кваліфікаваны спецыяліст вярнуўся на Кіраўшчыну і пачаў свой нялёгкі, але такі неабходны грамадству шлях служэння Народу, закону, Айчыне.

З першых дзён сваёй працоўнай дзейнасці Максім Дудзінскі зарэкамендаваў сябе граматным і адказным спецыялістам, якому па сілах вырашэнне многіх складаных задач. Нездарма, калі ў раёне пачынала сваю работу новая структура — раённы аддзел Следчага камітэта Рэспублікі Беларусь — маладому спецыялісту прапанавалі месца следчага.

З таго моманту ён разам з калегамі стаіць на варце захавання закону ў самых розных сферах дзейнасці.

Штодзённыя абавязкі старшага следчага вельмі разнастайныя: прыняцце і разгляд заяў грамадзян, расследаванне крымінальных спраў па розных саставах злачынстваў і іншае.

Максім Дудзінскі пастаянна займаецца самаразвіццём, павышае сваю прафесійную падрыхтоўку. У 2016 годзе, без адрыву ад службы, ён закончыў факультэт “Фінансы і крэдыт” Беларускага дзяржаўнага эканамічнага універсітэта. Па яго словах, атрыманая тут прафесія вельмі дапамагае яму ў следчай рабоце, бо эканамічныя злачынствы, якія даводзіцца расследаваць, патрабуюць вельмі грунтоўных навыкаў і ведаў менавіта ў фінансавай сферы.

Са станоўчага боку адзначае работу Максіма Дудзінскага кіраўніцтва раённага аддзела Следчага камітэта. Яго вызначаюць дакладнасць і адказнасць, высокая выканальніцкая дысцыпліна, жаданне зрабіць даручаную справу дасканала і высокапрафесійна. Па выніках некалькіх апошніх гадоў старшы следчы Максім Дудзінскі быў прызнаны лепшым супрацоўнікам аддзела. Менавіта яму даручаюць разгляд найбольш складаных спраў.

Фота Людмілы СЯМЁНАВАЙ.