Шчырыя віншаванні ад вялікай арміі навучэнцаў Жыліцкага сельгаскаледжа гучаць у гэтыя сакавіцкія дні ў адрас жанчын-выкладчыц, якія штодзень даносяць да сваіх выхаванцаў азы навуковых дысцыплін, папаўняючы іх багаж ведаў. Самыя добрыя, сардэчныя словы і пажаданні адрасуюцца ў ліку іншых і Таццяне Віктараўне Арлоўскай — выкладчыку агранамічных дысцыплін.

Кормавытворчасць, нарыхтоўка кармоў — без ведання сучасных тэхналогій немагчыма забяспечыць грамадскае пагалоўе якаснымі, збалансаванымі кармамі, а, значыць, забяспе­чыць рост мяса-малочнай вытворчасці. Усе неабходныя тэарэтычныя веды ў гэтым накірунку імкнецца данесці да сваіх навучэнцаў Таццяна Віктараўна. Асаблівая ўвага на яе занятках скіроўваецца на вырошчванні сельскагаспадарчых культур з выкарыстаннем энергазберагаючых тэхналогій.
Таццяна Арлоўская — высокакласны спецыя­ліст свайго профілю. Ураджэнка Рагачоўскага раёна Гомельскай вобласці, яна сама ў свой час паспяхова скончыла Жыліцкі сельгастэхнікум, потым — аграфак Беларускай дзяржаўнай сельгасакадэміі. І вось ужо больш за 15 гадоў сее “разумнае, добрае, вечнае” ў роднай сель­гас­установе. Паралельна выкладчыцкай дзейнасці праводзіць значную метадычную работу, а таксама загадвае лабараторыяй кормавытворчасці, дзе разам з навучэнцамі займаецца практычнай дзейнасцю. Апошнія з вялікай павагай ставяцца да любімага настаўніка — кампетэнтнага спецыя­ліста, строгага педагога і адначасова душэўнага, добрага і чулага чалавека.
Сваёй прафесійнай мэтай Таццяна Віктараўна лічыць вырасціць з кожнага навучэнца высока­адукаванага спецыяліста. І сярод яе выпускнікоў нямала такіх. Многія працуюць па атрыманай спецыяльнасці ў нашым раёне і за яго межамі, некаторыя ўжо з’яўляюцца кіраўнікамі сельгасарганізацый.
Цёплыя віншаванні з нагоды жаночага свята адрасуюць Таццяне Віктараўне і яе дамачадцы. З мужам Сяргеем Сяргеевічам яны дружна ідуць па жыцці з самага юнацтва, калі сустрэліся і пакахалі адзін аднаго ў гады вучобы. Разам скончылі Жыліцкі сельгас-
тэхнікум, потым вучыліся ў акадэміі, разам цяпер працуюць выкладчыкамі ў каледжы. На радасць бацькам іх дзеці. Старэйшы сын Віталь — уладальнік трэцяй прэміі спецыяльнага фонду Прэзідэнта Рэспублікі Беларусь па падтрымцы адораных вучняў і студэнтаў, унесены ў банк дадзеных адоранай моладзі краіны. 10-класнік Жыліцкай СШ ужо двойчы станавіўся пераможцам рэспубліканскага конкурсу эколага-біялагічных работ. У малодшай дачкі — трацякласніцы Лізы — перамогі, думаецца, яшчэ наперадзе, бо яна вельмі стараецца добра вучыцца. А мама і тата, безумоўна, і ў вучобе, і ва ўсіх іншых жыццёвых пытаннях дапамагаюць сваім дзецям.
Аляксандр ХАХЛОЎ.