Займацца творчасцю, атрымліваць новыя карысныя веды, цікава праводзіць час з сябрамі, быць у цэнтры культурнага і спартыўнага жыцця раёна — гэта і многае іншае прапануе дзецям і падлеткам Цэнтр дадатковай адукацыі дзяцей і моладзі, калектыў якога па выніках раённага спаборніцтва за 2017 год быў прызнаны лепшым сярод калектываў устаноў пазашкольнага выхавання і навучання.

Асаблівы гонар Цэнтра — поспехі яго выхаванцаў на міжнародных, рэспубліканскіх и абласных конкурсах. За мінулы год скарбонка ўзнагарод ўстановы папоўнілася 66 дыпломамі розных узроўняў.
Мастацкі профіль — адзін з самых масавых і папулярных. Ён уключае ў сябе харэаграфічны, музычны, тэатральны напрамкі, выяўленчую дзейнасць і дэкаратыўна-прыкладную творчасць. Напрыклад, дзякуючы таленту і майстэрству педагога Анастасіі Каўрыжкінай, дзяцей і дарослых прыцягваюць заняткі па харэаграфіі.
Візітная картка Цэнтра — узорная студыя юнага ма­дэльера «Жамчужына» пад кіраўніцтвам Эльвіры Перадня і Таццяны Рудак. За 2017 год студыя адзначана 10 дыпломамі, сярод якіх 5 дыпломаў конкурсу «Добры дзень, свет!»: 4 — абласнога ўзроўню, 1 — рэспубліканскага).
Стабільна высокія вы­нікі паказва­юць хлопцы і дзяўчаты з інтэлектуальнага клуба «Эрудыт», які больш за 20 гадоў паспяхова функцыяніруе пад кіраўніцтвам Ігара Лукашова. 23 дыпломы зароблена ў мінулым годзе за ўдзел у розных інтэлектуальных турнірах.
Адзін з прыярытэтных напрамкаў работы Цэнтра — развіццё дзіцячага турызму і краязнаўства. Рабяты даведваюцца пра гісторыю і культуру нашай краіны, знаёмяцца з памятнымі месцамі і славутасцямі Кіраўшчыны, самі распрацоўваюць турыстычныя маршруты па раёне, удзельнічаюць у паходах.
Значнае месца ў сістэме дадатковай адукацыі займае тэхнічны профіль. У Цэнтры гэты напрамак прадстаўлены аб’яднаннем «Мотааматары» (кіраўнік Сяргей Маркевіч). Хлопцы не толькі актыўна ўдзельнічаюць у спаборніцтвах па картынгу ў іншых гарадах, але і самі аргані-
зуюць падобныя мерапрыемствы на Кіраўшчыне. Дарэчы, з гэтага навучальнага года картынгам сталі захапляцца і дзяўчынкі. І, што цікава, часам «слабы пол» выступае лепш хлопцаў.
Рабяты з аб’яднання па інтарэсах «Шчыт» фізкультурна-спартыўнага профілю (педагог Валерый Буднік) — пастаянныя ўдзельнікі і прызёры абласных спаборніцтваў па боксе. На іх рахунку за 2017 год — 10 дыпломаў І і ІІ ступеняў.
У Цэнтры працуе ваенна-патрыятычны клуб «Шчыт» пад кіраўніцтвам Анатоля Сцепановіча. На занятках моладзь адпрацоўвае навыкі сама­абароны, спасцігае асновы рукапашнага бою. Адкрылася новае аб’яднанне па інтарэсах — «Юны стралок», якім таксама кіруе Анатоль Сцепановіч. Тут хлопцы вучацца абыходзіцца са зброяй, трапна страляць.
Неабходна адзначыць, што заняткі ва ўсіх аб’яднаннях Цэнтра — бясплатныя. Бацькі ўдзельнічаюць у іх падтрымцы праз унясенне апякунскіх узносаў.
Ірына ШЫНКОЎСКАЯ, намеснік дырэктара
па вучэбна-выхаваўчай рабоце ЦДАДіМ.