Трэці год запар пераможцам раённага спаборніцтва сярод аддзелаў культуры, адукацыі Кіраўскага райвыканкама, УЗ “Кіраўская ЦРБ” за 2017 год стаў аддзел адукацыі, спорту і турызму райвыканкама. Аб дасягнутых поспехах расказ­вае начальнік аддзела Наталля ТРАЦЦЯКОВА:
— На ўспамін прыходзіць момант з урачыстага мерапрыемства па падвядзенні вынікаў работы галін народнай гаспадаркі за 2016 год. Я тады вельмі хвалявалася, калі ўзнялася на сцэну. А старшыня райвыканкама Аляксандр Бутараў, які ўручаў Ганаровы пераходны сцяг раённага выканаўчага камітэта, ціха прамовіў, усміхаючыся: “Трымайце мацней!..”. Што ж, сцяг удалося ўтрымаць у руках!
А калі гаварыць сур’ёзна, за агульнай чарговай перамогай стаіць зробленая вялікім калектывам работнікаў раёна карпатлівая работа па многіх накірунках. Адным з галоўных паказчыкаў з’яўляліся рэзультаты навучальна-выхаваўчай дзейнасці, якія вызначала колькасць перамог вучняў раёна ў абласных, рэс­публіканскіх і міжнародных алімпіядах, конкурсах, выставах,спартыўных спаборніцтвах, турнірах. У мінулым годзе вучні нашага раёна заваявалі 134 прызавых месцы на абласным, 32 — на рэспубліканскім і 84 — на міжнародным узроўнях.
Выкананне прагнозных паказчыкаў па тэмпах росту шчыльнасці паслуг насельніцтву за мінулы год склала 125% да ўзроўню 2016 г. Сюды ўвайшлі навучанне ў школе ранняга развіцця, рэпетытарства, вывучэнне прадметаў звыш вучэбных планаў, заняткі ў школе абітурыента і інш.
На 115% у параўнанні з папярэднім годам выкананы план па аказанні турысцкіх паслуг, на належным узроўні ўдалося спрацаваць па выкананні прагнозных паказчыкаў па энергазберажэнні.
Яшчэ адзін важны паказчык, які бярэцца ў разлік, — камп’ютарызацыя ў кіраўніцкай і прафесійнай дзейнасці. На бягучы момант у педустановах раёна выкарыстоўваецца 87 камп’ютарных праграм.
Хацелася б шчыра падзякаваць калектывам устаноў адукацыі раёна, якія плённа і мэтанакіравана працуюць на працягу многіх гадоў, у тым ліку і ў мінулым. Сярод іх — работнікі абедзьвюх гарадскіх школ, Паўлавіцкай СШ імя Р.А.Худалеева, дзіцячых садкоў №4, №2 г.Кіраўска, “Вясёлка” аг.Мышкавічы, Цэнтра дадатковай адукацыі дзяцей і моладзі і іншых.