Фестываль сена “Сенафэст-2023” прайшоў у Чыгірынцы
У мінулую суботу бераг Чыгірынскага вадасховішча стаў месцам правядзення яркага, цікавага і маляўнічага мерапрыемства – традыцыйнага рэгіянальнага фестывалю сена “Сенафэст”, які ўпершыню быў наладжаны на Кіраўшчыне ў 2017 годзе.
Пара сенакосу ў сяльчан заўсёды была чакаемай падзеяй: калі кармоў для жывёлы было ў дастатку, значыць можна разлічваць на сытную зімоўку, на дабрабыт хатняй гаспадаркі. У сучасным жыцці правядзенне такіх мерапрыемстваў дазваляе адраджаць народныя традыцыі і абрады беларусаў, традыцыйную культуру сенакоснай гарачай пары, а таксама павышаць турыстычную прывабнасць Кіраўскага краю.
Удзел у мерыпрыемстве прынялі ганаровыя госці – старшыня райвыканкама Галіна Слабоднікава і старшыня раённага Савета дэпутатаў Алена Сакадынец.
Удзельнікаў фестывалю вітала намеснік старшыні райвыканкама Таццяна Бяляўская, якая адзначыла, што за гады свайго існавання фестываль сена “Сенафэст” стаў чакаемым і любімым мерапрыемствам не толькі для сяльчан, але і для гараджан.
Вядучыя свята нагадалі, што раней у першы дзень выхаду сяльчан на сенакос жанчынамі праводзіўся абрад “Сенны пояс”. Выконваючы абрадавую песню, яны рухаліся па сенакосе, а старэйшая з сяльчанак прасіла ў Бога дапамогі на спрыяльнае надвор’е і густыя травы. Пасля гэтага жанчыны збіралі свежаскошаную траву, зівавалі і скручвалі яе ў доўгія жгуты, з якіх плялі травяныя паясы, уплятаючы ў іх палявыя кветкі. Культработнікі ўвасобілі ў жыццё гэты прыгожы беларускі абрад, а сенны пояс быў перададзены гаспадарам прыгожага Чыгірынскага краю, які прымае на сваёй зямлі фестываль сена, – калектыву СГФ “Чыгірынка” РУП “Беларуснафта-Магілёўаблнафтапрадукт”.
Па традыцыі на фестывалі сабраліся ўмельцы-касцы, якія паспрачаліся за званне лепшых у спаборніцтвах па сенакашэнні і стагаванні. Упершыню на сёлетнім мерапрыемстве паспрабаваць свае сілы ў гэтым мужчынскім занятку вырашылі прадстаўніцы цудоўнай паловы чалавецтва. Апладысментамі сустракалі каманды ўдзельнікаў: “Вясковыя хлопцы” ААТ “Кіраўскае райаграпрамтэхзабеспячэнне”, “Дабаснянскія хлопцы” ААТ “Дабаснянскае”, “Малайцы – удальцы” КСУП “Чырвоны баец” і Паўлавіцкага сельскага Цэнтра культуры, “Рыцары поспеху” КСУП “Ніва-Барсукі”, “Фартуна” ААТ “Рассвет імя К.П.Арлоўскага”, прадстаўнікоў Стайкаўскага сельвыканкама – каманду “Асілкі”, Жыліцкага сельгаскаледжа – “Вікторыя”, Мышкавіцкага СДК – “Кветачкі”.
Першым этапам спаборніцтва стала касьба траў на хуткасць і якасць, другім – ювелірная касьба, калі камандам-удзельніцам неабходна было акуратна абкасіць траву вакол фігуры, трэцім –
стагаванне сена, дзе неабходна было сабраць стог сена: тут ацэньвалася вышыня, акуратнасць, хуткасць правядзення работ.
Трэба адзначыць, што на беразе вадасховішча было горача не толькі ад спякотнага надвор’я, але і ад накалу эмоцый каманд і іх балельшчыкаў. Падчас спаборніцтваў сярод каманд панавала сяброўская атмасфера, але трапіць у лік пераможцаў жадалі ўсе, таму кожны ўдзельнік імкнуўся не падвесці калег і быць на вышыні.
У выніку ўпартай барацьбы 1 месца ў намінацыі “касьба сена на хуткасць і якасць” заваявала каманда “Малайцы – удальцы” КСУП “Чырвоны баец” і Паўлавіцкага сельскага Цэнтра культуры, 2 месца на рахунку прадстаўнікоў Стайкаўскага сельвыканкама, 3 – у каманды “Рыцары поспеху” КСУП “Ніва-Барсукі”. У “стагаванні сена” не было роўных камандзе “Дабаснянскія хлопцы” ААТ “Дабаснянскае”, другімі сталі прадстаўнікі ААТ “Кіраўскае райаграпрамтэхзабеспячэнне”, трэцімі – каманда КСУП “Ніва-Барсукі”.
Увазе гасцей фестывалю былі прадстаўлены выставы фігур з сена і традыцыйнага сенакоснага інвентару. Былі наладжаны майстар-класы па вырабе лялек з сена і саломы, а таксама сувенірнай прадукцыі. Зацікаўленасць выклікалі розныя конкурсы: касцюмаў з прыродных матэрыялаў “ЭКАмода” і пляцення вянкоў “Палявы цуд”. Для дзяцей і падлеткаў была наладжана забаўляльна-гульнявая праграма.
Людміла СЯМЁНАВА.
Фота Аляксандра ХАХЛОВА.