На другім паверсе раённага Дома культуры ў фае распачала сваю работу выстава “Лялькі маёй Кіраўшчыны”, наладжаная ў межах правядзення абласнога агляду-конкурсу “Магілёўская лялька ў рэгіянальным строі”. Тут прадстаўлены творчыя работы майстроў і ўмельцаў з нашага раёна. Кожны з удзельнікаў уклаў сваю душу, фантазію і цярплівасць у стварэнне лялек нашага рэгіёна.

Падчас урачыстага адкрыцця выставы, на якое сабраліся дзеці і дарослыя, ганаровае права перарэзаць чырвоную стужку было прадстаўлена начальніку аддзела ідэалагічнай работы, культуры і па справах моладзі райвыканкама Андрэю Карпуку.
Было адзначана, што, узнікнуўшы шмат часу таму, лялька не толькі не страціла сваёй актуальнасці, але, перажыўшы некалькі этапаў свайго развіцця, ператварылася ў прадмет глыбокага навуковага даследавання.
Спачатку лялька служыла татэмам і абрадавым сімвалам, дастаткова марудна ператвараючыся ў выключна забаўляючы дзіцяці прадмет.
Яшчэ не было лялечных магазінаў, а ў кожнай сям’і былі свае лялькі. Гэта не проста цацка, а частка духоўнага багацця кожнага народа. “Согрета человеческим теплом тех рук, что эту куклу создавали, лелеяли, ночами обшивали, теперь она несет тепло в твой дом…”, — сказаў паэт.
У пачатку ХХ стагоддзя “Лялечныя забавы” сталі любімым масавым гуляннем, менавіта тады ўзнікла ідэя ўнесці гэтае свята ў агульны дзяржаўны і царкоўны каляндар. Гэтак у лялькі, у тым ліку і на тэрыторыі Беларусі, з’явілася сваё свята, на якое кожная майстрыха старалася зрабіць самую прыгожую ляльку “Забавушку”.
Пазней гэтая традыцыя знікла, і толькі ў 2008 годзе група энтузіястаў і аматараў беларускай лялькі вырашыла адрадзіць яе. З 2010 года 16 лістапада прынята лічыць Днём беларускай лялькі.
Расказваць, якія прыгожыя і цудоўныя лялькі на выставе, — няўдзячная справа. Лепш кіраўчанам і жыхарам раёна самім наведаць выставу і пераканацца ў гэтым (яна будзе працаваць да мая).
Дапоўнілі выставу прыватныя калекцыі лялек кіраўчанак Марыі Куніцкай і Алены Мурашка.
Гледачы на адкрыцці выставыі падчас праводзімага галасавання вызначылі лепшыя работы: лялька “Мар’я” (Ларыса Пандзіна, РДК), “Вяснянка” (Аліна Якавенка, дзіцячая школа мастацтваў г.Кіраўска), “Крупенічка” (Аксана Абражэй, Дабаснянскі СДК).
Галасаванне гледачоў працягваецца. Лепшая работа будзе прадстаўляць раён на абласным конкурсе.