У гэтыя дні не змаўкае тэлефон кіраўчанкі Ядзвігі Лешуковіч — родныя, калегі па рабоце, знаёмыя, сябры, суседзі спяшаюцца павіншаваць яе з юбілеем. Гледзячы на мілавідны твар з прыемнай усмешкай, слухаючы спакойны голас, мімаволі залюбуешся ёю. І гэта неадзінкавае сцвярджэнне.
У калектыве ПМК-255, дзе Ядзвіга Францаўна на працягу 30 гадоў працуе галоўным бухгалтарам, яе паважаюць за прафесіяналізм, дакладнасць, адказнасць. Колькі квартальных, гадавых справаздач за гэты перыяд давялося здаваць у вышэйстаячыя арганізацыі — не пералічыць! І вопытны спецыяліст заўсёды робіць усё неабходнае своечасова і правільна.
Аб добрасумленных адносінах да справы сведчаць шматлікія Ганаровыя граматы, якія жанчына беражліва захоўвае. Да Ядзвігі Францаўны часта звяртаюцца за кваліфікаванай кансультацыяй бухгалтары іншых аднатыпных арганізацый і ў абавязковым парадку заўсёды атрымаюць канкрэтную дапамогу.
Сяброўкі, суседзі цэняць Лешуковіч за яе шчырае сэрца, дружалюбнасць і гумар. Яна кожнага падбадзёрыць, падтрымае добрым словам і канкрэтнай справай, заўсёды прыдзе на дапамогу. У Ядзвігі Францаўны можна многаму навучыцца, ёсць што пераняць, бо яна пастаянна цікавіцца навінкамі па агародніцтве, кулінарыі, дамашніх загатоўках і прымяняе іх на практыцы.
Родныя жанчыны — муж Уладзімір, з якім пражылі разам 37 гадоў, дачка Таццяна, сын Аляксандр, унучкі Марыя і Анастасія — зачараваны любімай Ядзвігай, цудоўнай матуляй, пяшчотнай бабуляй, выдатнай гаспадыняй і проста абаяльнай жанчынай.
Таццяна БАРАДЗІНА.
Фота
Максіма МІКЕШЫНА.