Урачысты прыём, прысвечаны Дню жанчын, прайшоў 6 сакавіка ў Магілёве. Трыццаць выдатных прадстаўніц розных сфер і прафесій Прыдняпроўскага краю прымалі віншаванні ад першага намесніка старшыні Магілёўскага аблвыканкама Сяргея Савіцкага.

Сярод іх – намеснік дырэктара па вучэбнай рабоце Жыліцкага дзяржаўнага сельскагаспадарчага каледжа Таццяна Арлоўская (на фота), якая прысвяціла педагагічнай дзейнасці больш за 20 гадоў. Свой працоўны шлях Таццяна Віктараўна пачынала тут жа, у каледжы, у 2001 годзе выкладчыкам агранамічных дысцыплін.

Жыццёвая гісторыя Таццяны Арлоўскай, з аднаго боку, з’яўляецца самай звычайнай. З другога ж, – гэта прыклад адданасці сваёй справе і любові да роднай установы адукацыі. Бо калісьці яна была навучэнкай гэтага ж каледжа, і, скончыўшы яго, не пакінула, а засталася, каб перадаваць свае веды і вопыт новым пакаленням навучэнцаў. Такі шлях адлюстроўвае яе прыхільнасць да гэтага кутка кіраўскай зямлі – гістарычнага, сапраўды дзіўнага, поўнага таямніц і чароўнай прыгажосці месца, яе жаданне развіваць і падтрымліваць яго традыцыі. Таццяна Віктараўна ганарыцца тым, што мае магчымасць унесці пасільны ўклад у развіццё не толькі свайго раёна, але і краіны ў цэлым. Яе праца – гэта прыклад таго, як вернасць прафесіі і ўстанове адукацыі можа стаць асновай паспяховай кар’еры.
Таццяна Арлоўская нарадзілася і вырасла на Гомельшчыне, у суседнім Рагачоўскім раёне. Бацькі не былі ні выкладчыкамі, ні работнікамі сельскай гаспадаркі, але Таццяна выбрала менавіта Жыліцкі сельгаскаледж і ніколі не пашкадавала пра гэта, а наадварот, працягнула ўдасканальвацца ў прафесіі: скончыла Беларускую дзяржаўную сельскагаспадарчую акадэмію спачатку па спецыяльнасці “Агранамія”, а потым – па спецыяльнасці “Педагагічная дзейнасць спецыялістаў”.
“Таццяна Віктараўна – вопытны выкладчык, добры сябар і таварыш, умее знайсці падыход да кожнага навучэнца, – адзначае дырэктар каледжа Аляксандр Адзіночанка. – А ў ролі намесніка па вучэбнай рабоце яна праяўляе неверагодную адказнасць і клопат, не толькі ўмела кіруе навучальным працэсам, але і стварае атмасферу даверу і ўзаемаразумення, у якой і выкладчыкі, і навучэнцы адчуваюць падтрымку і імкненне да поспеху. Яе адкрытасць, справядлівасць, цярпенне і прафесіяналізм ствараюць прастору для іх росту і самаразвіцця”.
Акрамя прафесійных дасягненняў, Таццяна Арлоўская – выдатная жонка і маці. Яна ганарыцца сваёй сям’ёй, сваімі дзецьмі: сын – дарослы, самастойны малады чалавек, дачка – дзесяцікласніца Жыліцкай школы. Сям’я для Таццяны Віктараўны – гэта крыніца натхнення і сілы, менавіта яна дапамагае знайсці баланс паміж кар’ерай і асабістым жыццём. Таццяна Арлоўская жыве ў гармоніі з сабой і навакольным светам, заўсёды аддаючы частку сваёй энергіі і ўвагі тым, хто яе акружае.
Звычайнае жыццё звычайнай жанчыны – яркі прыклад таго, як можна спалучаць прафесійныя поспехі з сямейным шчасцем, як важна захоўваць шчырасць і вернасць сваім каштоўнасцям, натхняць тых, хто побач, сваім прыкладам. Таццяна Арлоўская – гэта не толькі прафесіянал сваёй справы, але і чалавек, які ўносіць у калектыў каледжа і сваю сям’ю атмасферу ўтульнасці, добразычлівасці і адказнасці.

Галіна РУСЕЦКАЯ.