Адзначаны лідары прафсаюзнага руху Кіраўшчыны
Напярэдадні Свята працы Рэспубліканскі камітэт Беларускага прафесійнага саюза работнікаў аграпрамысловага комплексу арганізаваў урачыстае мерапрыемства, падчас якога былі адзначаны найбольш актыўныя лідары прафсаюзнага руху. Сярод іх – старшыня пярвiчнай прафсаюзнай арганізацыі ААТ “Кiраўскае райаграпрамтэхзабеспячэнне” Раіса Русецкая, якая ўдастоена Граматы рэспубліканскага камітэта Беларускага прафсаюза работнікаў АПК (на фота).
Раіса Пятроўна ўзначальвае прафсаюзную пярвічку на працягу 14 гадоў. Увесь гэты час члены прафсаюза таварыства прымаюць актыўны ўдзел у мерапрыемствах, якія праводзяцца і ў гаспадарцы, і ў раёне. Вялікая ўвага тут надаецца стварэнню належных умоў для арганiзацыi працы i вытворчага быту, арганізацыі вольнага часу працуючых і членаў іх сем’яў, іх здаровага ладу жыцця. Таму прафесійныя якасці старшыні прафкама, яе грамадзянская пазіцыя, значны ўклад у развіццё сацыяльнага партнёрства па абароне правоў і законных інтарэсаў членаў прафсаюза так высока ацэнены кіраўніцтвам.
У перадсвяточныя дні сваю заслужаную ўзнагароду атрымала і старшыня пярвiчнай прафсаюзнай арганізацыі ААТ “Добаснянскае” Святлана Голікава.
У ліку лепшых актывістаў вобласці за шматгадовую добрасумленную працу, асабісты ўклад у развіццё і ўдасканаленне прафсаюзнага руху, умацаванне сацыяльнага партнёрства старшыня Магілёўскай абласной прафсаюзнай арганізацыі работнікаў АПК Уладзімір Пятровіч уручыў Святлане Яўгенаўне нагрудны знак “Гонар прафсаюзнага руху”.
Святлана Голікава займае актыўную жыццёвую пазіцыю, старшынёй пярвічкі з’яўляецца з 2004 года. За гэты час члены прафсаюзнай арганізацыі, а гэта ўсе працуючыя ў гаспадарцы, з’ядналіся агульнымі ідэямі і мэтамі, актыўна ўдзельнічаюць у грамадскім жыцці сельгасарганізацыі, раёна.
