БССР – цэлая эпоха ў гісторыі, якая стала падмуркам для сучаснай беларускай дзяржаўнасці. У краіне гэтая знамянальная дата адзначаецца паўсюдна. Не засталася ў баку і Мышкавіцкая СШ.
Інфармацыйныя гадзіны з нагоды 100-годдзя БССР прайшлі ва ўсіх класных калектывах, у бібліятэцы аформлена тэматычная выстава. Аб гэтым расказала намеснік дырэктара ўстановы адукацыі па навучальнай рабоце Любоў Маркевіч.
Для вучняў 7-11 класаў адбылася агульная інфармацыйная гадзіна, якая называлася “100 год БССР”. Прапагандысцкая група пазнаёміла прысутных з асноўнымі падзеямі ў жыцці БССР – ад стварэння і калектывізацыі да значных дасягненняў і перыяду крызісу. Рабяты паведамілі аб беларускіх брэндах, якія і зараз карыстаюцца папулярнасцю.
Цікавай была рэтра-выстава “Назад у БССР”, наладжаная з дапамогай настаўнікаў і вучняў (дакладней, іх бацькоў). Элементам экспазіцыі былі фотаздымкі з фонду школьнага музея, на якіх захаваны асноўныя падзеі з жыцця БССР: з’езды ВЛКСМ, Камуністычнай партыі Беларусі, аднаўленне заводаў і вёсак сіламі камсамольцаў, аб’яднанне Заходняй Беларусі з БССР, партызанская барацьба, пасляваеннае аднаўленне і многае іншае.
А асноўную частку выставы складалі рэчы, якімі карысталіся ў перыяд існавання БССР. Увагу ўсіх “прыкавала” друкаваная машынка, лічыльнікі, камсамольскія і партыйныя білеты, калекцыі марак і значкоў, песеннік, ёлачныя цацкі і многае іншае. Хлопчыкі ў першую чаргу цікавіліся прыстаўкай “Дэндзі”, касетным магнітафонам і “дэмбельскімі альбомамі”.
Школьнікі з цікавасцю разглядалі экспанаты, бо гэта была магчымасць акунуцца ў эпоху сваіх бацькоў, бабуляў і дзядуляў, зразумець, чым тады даражылі, а для настаўнікаў — успомніць дзяцінства і маладосць…