Міжнародны дзень роднай мовы быў абвешчаны Генеральнай канферэнцыяй ЮНЕСКА ў лістападзе 1999 года і адзначаецца кожны год з лютага 2000 года для садзейнічання моўнай і культурнай разнастайнасці і шматмоўнасці.

Cёння у свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна родная мова. І вельмі дрэнна, калі чалавек пачынае забывацца на сваю мову, не шануе яе.

Беларуская мова – самая мілагучная пасля італьянскай, вырашылі эксперты ЮНЕСКА. Гісторыкі сцвярджаюць, што яна яшчэ і самая старажытная сярод славянскіх.

Як паведаміла нанамеснік загадчыка па асноўнай дзейнасці ясляў-садка “Вясёлка” аг.Мышкавічы Вераніка Асташова, у іх устанаве адукацыі святкаванне Міжнароднага дня роднай мовы свята ўжо стала добрай традыцыяй. Гэты год не выключэнне. Свята мовы пачалося ў нас яшчэ задоўга да 21 лютага.

З 17 лютага ва ўстанове былі аформлены інфармацыйныя стэнды. Яны пазнаёмілі бацькоў з гісторыяй свята. Таксама ў групах выхавальнікамі былі падрыхтаваны выставы кніг і часопісаў.

21 лютага для выхаванцаў  педагогі падчас мастацкай дзейнасці чытаюць беларускія казкі. Традыцыйна ў межах свята роднай мовы праводзіцца конкурс чытальнікаў беларускай паэзіі. Выхаванцы сярэдніх і старэйшых груп прымаюць ўдзел у гэтым выпрабаванні.

Асаблівую цікавасць у выхаванцаў і бацькоў выклікалі насценныя газеты, якія падрыхтавалі выхавальнікі пасля правядзення піяр-акцыі “Мае любімыя беларускія словы”. Акцыя мела мэту звярнуць увагу на сакавітае гучанне і спецыфічны каларыт роднай мовы. Самымі папулярнымі словамі былі: каханне, калі ласка, Радзіма, маці.

Мы ўсе павінны берагчы гэты духоўны скарб, і тады жывая і непаўторная родная мова раскажа ўсяму свету пра нашу краіну!