Працягваем публікацыю ўспамінаў ўдзельнікаў Усебеларускіх народных сходаў мінулых год ад нашага раёна, іх прапаноў для абмеркавання на прадстаячым народным форуме.

Алена ПАРХАМОВІЧ, настаўнік працоўнага навучання СШ №1:

– Я была дэлегатам IV Усебеларускага народнага сходу, які праходзіў у 2010  годзе. Уражанні ад яго засталіся ў памяці дагэтуль. Упэўнілася асабіста, што на гэтых форумах  вызначаюцца напрамкі рэалізацыі галоўнай задачы: павелічэнне якасці жыцця людзей. Наша краіна паступова і дынамічна развіваецца ад пяцігодкі да пяцігодкі, вырашаючы пастаўленыя задачы. У сваёй дзяржаве мы вырашаем, якім шляхам развівацца нашай рэспубліцы.

Прадстаячы лютаўскі  форум стане вынікам работы дыялогавых пляцовак, якія праходзілі па ўсёй краіне. Удзельнікі павінны вызначыць лепшыя і важнейшыя ініцыятывы, якія ў далейшым лягуць у аснову трывалага падмурка нашага грамадства, напрамкі сацыяльна-эканамічнага развіцця Рэспублікі Беларусь на 2021-2025 гады, якія вынесены на ўсеагульнае абмеркаванне.

Я працую ў школе, і мяне, безумоўна, цікавяць пытанні, якія тычацца сферы адукацыі.  Жадала б, как на сходзе ў гэтым плане былі прыняты адпаведныя рашэнні. У прыватнасці, лічу, што нам неабходна павысіць узровень адукацыі, статус настаўніка,.

Таксама патрэбна ўзмацніць адказнасць сям’і за выхаванне дзяцей, актывізаваць прапаганду сямейных каштоўнасцей. У некаторых людзей сёння складваецца меркаванне, што гэтая задача практычна поўнасцю ляжыць на педагогах. Бацькі ўсё ж у працэсе выхавання павінны быць больш дзейнымі. 

Хвалюе таксама пытанне прафарыентацыі вучняў, узаемадзення школ і ўстаноў адукацыі сярэдняга спецыяльнага і вышэйшага звяна. З боку каледжаў і ВНУ павінна зыходзіць больш ініцыятывы ў арыентаванні школьнікаў да той ці іншай прафесіі, каб іх прадстаўнікі сустракаліся і ўзаемадзейнічалі з вучнямі не разава, а значна часцей і  актыўней. Гэта дазволіць будучым выпускнікам больш асэнсавана падысці да выбару свайго накірунка далейшай дзейнасці. З прафарыентацыяй звязаны яшчэ адзін момант, на які, я б жадала, каб была звернута ўвага: на маю думку, трэба больш павялічыць колькасць класаў тэхніка-тэхналагічнай накіраванасці, ствараць практыка-арыентаванае асяроддзе. З асабістага вопыту работы ведаю перавагі практычнага навучання: некалькі маіх вучняў сталі пераможцамі рэспубліканскай алімпіяды па працоўным навучанні.