Выпускніца 2025 года Мышкавіцкай сярэдняй школы Ксенія Сібіркова ўдастоена ганаровага звання лаўрэата спецыяльнай прэміі Магілёўскага абласнога выканаўчага камітэта ў сацыяльнай сферы ў намінацыі “Адукацыя”. Гэта значнае прызнанне яе ўкладу ў развіццё адукацыйных ініцыятыў і актыўную жыццёвую пазіцыю.

Дыплом, які пацвярджае высокую ацэнку яе дасягненняў, Ксенія атрымала ўрачыста ў Дзень народнага адзінства з рук старшыні аблвыканкама Анатоля Ісачанкі. Гэтая ўзнагарода стала не толькі прызнаннем яе заслуг, але і важным стымулам для далейшага развіцця, прафесійнага росту і актыўнага ўдзелу ў грамадскім жыцці.

“Для мяне атрыманне такой высокай узнагароды – гэта не толькі велізарны гонар, але і важны стымул працягваць удасканальвацца і ўносіць уклад у грамадскае жыццё, – падзялілася сваімі ўражаннямі Ксенія. – У школе я набыла каштоўныя веды і вопыт, навучылася працаваць у камандзе і заўсёды з задавальненнем прымала ўдзел у значных мерапрыемствах, якія праводзяцца ў раёне, вобласці, Рэспубліцы. У нашай краіне створаны ўсе неабходныя ўмовы для таго, каб моладзь магла рэалізаваць свой патэнцыял і дабіцца поспеху. А атрыманае прызнанне маіх заслуг – яшчэ адно таму пацвярджэнне. Разам мы зможам многае!”

Зараз Ксенія – студэнтка Беларускага дзяржаўнага педагагічнага ўніверсітэта імя Максіма Танка. Яна актыўна ўдзельнічае ў студэнцкім жыцці, імкнецца ўнесці ўклад у фарміраванне сучаснага адукацыйнага асяроддзя. Свой будучы працоўны шлях дзяўчына ўпэўнена звязвае з прафесіяй настаўніка, лічыць яе не проста працай, а сапраўдным прызначэннем, якое патрабуе адказнасці і любові да дзяцей. На яе думку, менавіта настаўнік фарміруе асобу, натхняе на мары і дапамагае зрабіць першыя крокі да поспеху.
Ксенія Сібіракова – прыклад актыўнай і мэтанакіраванай моладзі, якая не баіцца браць на сябе адказнасць, ставіць амбіцыйныя мэты і дасягае іх.