У Паўлавіцкай СШ ІМЯ Р.А.Худалеева прапагандзе здаровага ладу жыцця надаецца шмат увагі. Дзякуючы апантанаму ў сваёй справе настаўніку фізічнай культуры і здароўя Валерыю Варонічу слава пра нашых спартсменаў разышлася далёка за межы раёна і вобласці. Спартыўная зала ніколі не пустуе. Вучні нашай школы, а таксама моладзь аг.Паўлавічы і бліжэйшых навакольных вёсак кожны вечар збіраюцца тут, каб наладзіць спартыўныя гульні. Асабліва шматлюдна бывае зімой пасля здачы сесіі, калі амаль кожны выпускнік імкнецца прыйсці ў сваю любімую школу.

Папулярнымі ў нашай школе з’яўляюцца розныя віды спорту, але найбольшую цікавасць выклікае валейбол.
Нядаўна ў спартыўнай зале сабраліся прыхільнікі здаровага ладу жыцця і аматары спорту, каб правесці чарговы юбілейны (дзясяты па ліку) таварыскі турнір па валейболе. У ім прымалі ўдзел чатыры каманды: вучняў, настаўнікаў, выпускнікоў-студэнтаў і былых выпускнікоў, а зараз работнікаў КСУП “Чырвоны баец”. Адны прыйшлі паўдзельнічаць у спаборніцтвах, другія “толькі за перамогай”, але большасць (у тым ліку і балельшчыкі) проста за станоўчымі эмоцыямі і добрым настроем.
Пачатак спаборніцтваў паказаў, што барацьба за перамогу будзе захапляльнай і цікавай. З першай гульні ініцыятыву захапіла каманда КСУП “Чырвоны баец”, у саставе якой былі толькі мужчыны. Не адставала і каманда студэнтаў.
У чарговы раз у якасці суддзі выступіў намеснік дырэктара ДЮСШ Валерый Разумейка, з якім наша школа супрацоўнічае на працягу многіх гадоў.
Усе каманды паказалі добрую тэхнічную падрыхтоўку. Групы падтрымкі шчыра перажывалі за свае каманды. Кожны забіты мяч выклікаў бурныя апладысменты гледачоў. У зале панавалі смех, шум, радасць.
Але спаборніцтвы ёсць спаборніцтвы. Як ні імкнуліся да перамогі прадстаўнікі КСУП “Чырвоны баец”, але пераможная падача мяча Юрыя Макаронка прынесла першае месца самай дружнай і ўпэўненай у сваіх сілах камандзе настаўнікаў. Другімі былі прадстаўнікі КСУП “Чырвоны баец”, трэцімі – студэнты. Камандзе вучняў, на жаль, не хапіла вопыту і зладжанасці, хаця тэхніку яны паказалі даволі высокую. Дарэчы, самаму маладому ўдзельніку спаборніцтваў было 14 гадоў, а самаму “паважанаму” — 52.
Усе каманды атрымалі каштоўныя і салодкія прызы, а, галоўнае, запал добрага настрою і мора станоўчых эмоцый.
Ала МАКАРОНАК,
настаўніца беларускай мовы,
балельшчык каманды студэнтаў.