У гімназіі г.Кіраўска прайшло традыцыйнае святочнае мерапрыемства “Пасвячэнне ў гімназісты”, да якога пяцікласнікі доўга рыхтаваліся і на якім 24 вучні 5 класа былі ўрачыста прыняты ў вялікую дружную гімназічную сям’ю.
Святочная праграма пачалася з выступлення вядучых, якія нагадалі ўсім прысутным пра значнасць школы ў жыцці кожнага чалавека, расказалі пра асаблівасці работы гімназіі, а затым запрасілі на сцэну віноўнікаў урачыстасці, якія спецыяльна да свята падрыхтавалі прэзентацыю, дзе паведамілі пра свой клас і свае захапленні. Пяцікласнікі падарылі гледачам запал бадзёрасці, прадэманстраваўшы вакальныя і харэаграфічныя здольнасці, артыстызм, свой аптымістычны настрой і жаданне атрымліваць веды. Яны далі ўрачыстую клятву імкнуцца да ведаў, быць ветлівымі, не губляць магчымасці рабіць карысныя справы, любіць сваю Радзіму.
Кульмінацыйным момантам свята стала атрыманне гімназістамі знакаў адрознення — шэўронаў з выявай савы, якія ўручыла ім дырэктар гімназіі Галіна Русецкая. Яна павіншавала рабят і іх бацькоў са знамянальнай падзеяй, адзначыўшы, што навучанне — гэта важная ступень у жыцці, а гімназія — дастойная школа. Галіна Іванаўна пажадала ўсім здароўя і выказала ўпэўненасць, што пры жаданні і працавітасці ў вучняў усё атрымаецца. Да віншаванняў далучыліся класны кіраўнік і бацькі.
Свята атрымалася вясёлым, крыху кранальным, выклікала шмат цёплых пачуццяў і пакінула добрыя ўражанні.
Алена ПАЦЫЕНАК, класны кіраўнік 5 класа.