“Зноў у школу” – пад такім дэвізам сустракала ў першую суботу лютага сваіх выпускнікоў сярэдняя школа №1 г.Кіраўска. Яна запрасіла іх акунуцца ў свет успамінаў, дзе былі ўрокі і перапынкі, радасці і памылкі, поспехі і першае каханне, а таксама вера ў будучыню і мары, мары, мары.

Па словах намесніка дырэктара па выхаваўчай рабоце СШ №1 Любоў Маркевіч, у школу збіраліся тыя, хто адзначаў і “круглую” дату з моманту выпуску, і тыя, якія проста захацелі трапіць у дзяцінства,  пабыць школьнікамі, сустрэць сваіх аднакласнікаў незалежна ад года выпуску.

Былыя вучні пачалі прыходзіць у свой “другі дом” задоўга да пачатку святочнага мерапрыемства.  Яны з задавальненнем прайшлі па кабінетах і калідорах, наведалі свае класы, пагаварылі з класнымі кіраўнікамі. Ураджанні ў кагосьці выклікалі радасць, у кагосьці – слёзы. Галоўнае – не было раўнадушша. Бо школа для многіх стала стартавай пляцоўкай у сур’ёзнае самастойнае жыццё.

Шчаслівыя вочы, гордыя погляды класных кіраўнікоў, цёплыя ўспаміны, школьныя фотаздымкі – усё “здарылася” ў гэты вечар і пакінула ўспаміны да наступнай сустрэчы.