У мінулым нумары раённай газеты мы расказалі аб перамозе вучаніц СШ №1 г.Кіраўска Саміны Ахундавай і Кацярыны Бялянавай на заключным этапе рэспубліканскай алімпіяды па вучэбным прадмеце “Працоўнае навучанне”.

Сёння юныя таленты Кіраўшчыны дзеляцца сваімі ўражаннямі і пачуццямі з чытачамі раёнкі.

Конкурсныя выпрабаванні, удзел у якіх прынялі больш за 70 юных майстроў і рукадзельніц з розных куткоў краіны, праходзілі ў Жлобіне. Дзяўчаты засталіся задаволены арганізацыяй саміх іспытаў, а таксама ўмовамі пражывання і правядзення вольнага часу.

“Адчуванні неверагодныя, – падзялілася ўражаннямі Саміна. – Урачыстае закрыццё алімпіяды і ўзнагароджванне пераможцаў – так хвалююча. Набраўшы 85,983 бала, я думала, што траплю ў лік пераможцаў, але што гэта будзе лепшы вынік у рэспубліцы!.. Да апошняй хвіліны не верылася, што нарэшце атрымалася тое, да чаго ішла некалькі гадоў. Зразумела ж, я вельмі задаволена такім зыходам справы”.

Выніку ўдзелу ў алімпіядзе рада і Кацярына. Яшчэ б, пры такой канкурэнцыі, набраўшы крыху менш балаў за сяброўку (84,054), дзяўчына таксама атрымала дыплом І ступені! “Як толькі мы прыехалі ў Жлобін, адразу пачалі ўзмоцненую падрыхтоўку, а дакладней паўтарэнне вывучанага. 26 сакавіка прайшоў практычны тур, 27 – тэарэтычны. Мы да апошняга не ведалі вынікаў, адпаведна вельмі хваляваліся. Я была ўпэўнена, што дыплом будзе, але які. Аб яго вартасці даведалася толькі на ўрачыстасці. Радасці не было межаў! І за сябе, і за сябровак. Уявіце толькі: тры лепшыя вынікі ў прадстаўнікоў Магілёўскай вобласці!”

Абедзве дзяўчынкі лічаць свой поспех не выпадковым – гэта вынік штодзённай напружанай працы іх, настаўніцы Алены Уладзіміраўны Пархамовіч, якая ніколі не лічылася са сваімі інтарэсамі, імкнулася перадаць і навучыць усяму, што ўмее сама, а таксама бацькоў, якія разумеюць і падтрымліваюць сваіх дзяцей. Яны ўпэўнены, што ў адзіночку такога выніку дасягнуць было б
немагчыма. Акрамя афіцыйнай праграмы алімпіяды для юных талентаў былі падрыхтаваны экскурсіі на Беларускі металургічны завод, мемарыяльны комплекс “Дзецям-ахвярам вайны” і ў сядзібу Козел-Паклеўскіх ў Чырвоным Беразе.

Не менш, а магчыма і больш, радуецца поспехам сваіх вучаніц Алена Уладзіміраўна. На рахунку настаўніцы ўжо 11 дыпломаў на заключным этапе алімпіяды. Яна ўпэўнена, што і Саміна, і Кацярына абавязкова знойдуць правільнае прымяненне сваім ведам і ўменням. Тым больш, што ў Саміны, да прыкладу, акрамя перамогі ў алімпіядзе, у капілцы яшчэ і дыплом І ступені ўніверсітэцкай алімпіяды Баранавіцкага дзяржаўнага ўніверсітэта.

“Я ганаруся сваімі дзяўчатамі. Вельмі рада за іх. Магу толькі ўяўляць, наколькі ім сёлета было складана перасягнуць усе хваляванні, – гаворыць Алена Пархамовіч. – Справа ў тым, што летась у нас не атрымалася ажыццявіць задуманае, а ў Каці яшчэ і пазалетась. Але яны разумныя і ведаюць, што можна дасягнуць многага, калі вельмі захацець і шмат працаваць. Упэўнена, што кім бы яны ні сталі ў будучым, веды і практычныя навыкі, атрыманыя на ўроках абслугоўваючай працы, ім спатрэбяцца. Я ўдзячна дзяўчынкам за іх стараннасць і цярплівасць, іх бацькам і ўсім настаўнікам школы за разуменне і падтрымку.

Наша дзяржава клапоціцца аб адоранай моладзі. І тыя ільготы, якія дзяўчаты атрымліваюць пасля сваіх перамог, заслугоўваюць нейкіх ахвяр. Галоўнае, крочыць у правільным накірунку, не расслабляцца, працаваць…”

Дыплом на заключным этапе рэспубліканскай алімпіяды дае прэферэнцыі пры паступленні ў пэўныя вышэйшыя навучальныя ўстановы. Пераможцы маюць права прамога залічэння ў ВНУ па адпаведным профілі. Узнагарода за паспяховае выступленне на трэцім (абласным) этапе дазваляе выбраць рэгіянальную ВНУ і стаць яго студэнтам. Акрамя таго, дзяўчаты будуць унесены ў банк дадзеных адаронай і таленавітай моладзі, што таксама дае ім шэраг пераваг у будучым: пазачарговае атрыманне жылога памяшкання ў інтэрнаце на перыяд навучання; прызначэнне стыпендый Прэзідэнта Рэспублікі Беларусь; першачарговае размеркаванне (па выбары) пасля заканчэння ўстановы вышэйшай адукацыі.

Галіна РУСЕЦКАЯ. Фота Яўгеніі БЯЛЬКО.