Сёлета перад адзінаццацікласнікамі і каля 120 вучнямі 9 класаў школ раёна  стаіць няпростая задача — вызначыцца са сваёй будучай прафесіяй. Зрабіць правільны выбар вельмі важна, бо ўсім хочацца ў будучым быць запатрабаванымі на рынку працы, паспяховымі ў жыцці, атрымліваць годную зарплату. 

“Мы выбіраем прафесію” — дэвіз сёлетняй прафарыентацыйный сустрэчы з выпускнікамі школ раёна, якая адбылася ў дзіцячай школе мастацтваў. Удзел у ёй прынялі начальнік аддзела арганізацыйна-кадравай работы райвыканкама Ірына Сысоева, загадчык сектара занятасці насельніцтва ўпраўлення па працы, занятасці і сацыяльнай абароне райвыканкама Людміла Пімошына, прадстаўнікі вышэйшых і сярэдніх спецыяльных навучальных устаноў рэспублікі.
Метадыст аддзела адукацыі, спорту і турызму райвыканкама Алена Вавілава давяла да ведама рабят інфармацыю аб найбольш запатрабаваных прафесіях і вакансіях у нашым раёне, агучыла лічбы, якія сведчаць аб колькасці вучняў вызначыўшыхся ўжо са сваёй будучай прафесіяй.
Па традыцыі, знаёмства з працэсамі навучання ва ўстановах адукацыі праходзіла ў форме размовы і дэманстрацыі слайдаў-прэзентацый. Старшакласнікі мелі магчымасць даведацца не толькі пра парадак паступлення ў тую ці іншую навучальную ўстанову, але і пра створаныя там умовы для вучобы, пражывання і правядзення вольнага часу.
Шмат інфармацыі пачулі будучыя выпускнікі аб МДУ імя А.А.Куляшова, Віцебскай акадэміі ветэрынарнай медыцыны, Беларускай сельскагаспадарчай акадэміі, Беларускім аграрным тэхнічным універсітэце, Беларуска-Расійскім універсітэце.
Свае меркаванні аб атрыманні прафесійна-тэхнічнай адукацыі выказалі прадстаўнікі Магілёўскага гандлёвага каледжа спажыўкааперацыі і прафесіянальнага агралесатэхнічнага каледжа імя К.П.Арлоўскага, Клічаўскага аграрна-тэхнічнага каледжа, а таксама Жыліцкага сельгаскаледжа і ліцэя №15.
Была звернута ўвага на тое, што існуючае ў грамадстве меркаванне аб “непрэстыжнасці” прафесійна-тэхнічнай адукацыі з’яўляецца памылковым. Справа ў тым, што на сучасным рынку працы адчуваецца патрэба ў свайго роду “тэхнічнай эліце”: рабочых і служачых з развітымі практычнымі навыкамі працоўнай дзейнасці. Акрамя таго, атрыманне прафесійна-тэхнічнай адукацыі з’яўляецца больш даступным і мае шэраг пераваг у параўнанні з працягам навучання ў школе.
Аб высакароднай прафесіі медыцынскага работніка і сваім шляху ў гэтую прафесію расказаў прысутным урач-хірург райбальніцы Іван Трубкін. Супрацоўнікі РАУС Мікалай Назарчук і РАНС Арцём Марозаў пазнаёмілі рабят з умовамі паступлення і навучання ў спецыялізаваных навучальных установах.
Вялася таксама размова аб адрозненні прэстыжнай прафесіі ад запатрабаванай, аб прызванні і асабістых якасцях, якія неабходны ў той ці іншай сферах дзейнасці.
Падчас адбыўшайся прафарыентацыйнай сустрэчы рабяты мелі магчымасць задаць хвалюючыя іх пытанні і атрымаць вычарпальныя адказы.
Людміла СЯМЁНАВА.
Фота аўтара.