17 верасня – Дзень народнага адзінства
Свята, якое аб’ядноўвае
Дзень народнага адзінства – гэта свята, якое нагадвае пра важнасць адзінства і згуртаванасці народа. Ён сімвалізуе моманты, калі грамадства аб’ядноўваецца дзеля агульнай мэты, пераадольваючы рознагалоссі і цяжкасці. Гэта дзень, калі мы можам аддаць даніну павагі гісторыі, успомніць пра значныя падзеі і падкрэсліць важнасць узаемаразумення і падтрымкі. Для многіх гэта час для разважанняў пра тое, як важна працаваць разам для дасягнення агульных мэтаў і вырашэння праблем.
Мы пацікавіліся ў кіраўчан, што для іх значыць Дзень народнага адзінства і які сэнс яны ўкладваюць у гэтае свята.
Аляксандр БАГЕЛЬ, член Савета Рэспублікі Нацыянальнага сходу Рэспублікі Беларусь, дырэктар ААТ “Рассвет імя К.П.Арлоўскага”:
– Даючы сучасную ацэнку значнасці Гістарычнага ўз’яднання Заходняй Беларусі і БССР, можна з упэўненасцю сказаць, што гэты гістарычны факт стаў для беларусаў крыніцай, штуршком і правадніком для далейшага развіцця краіны ў ходзе шматвяковай беларускай гістарычнай традыцыі. У розныя гады Беларусь станавілася арэнай баявых дзеянняў, калі знішчалася ўсё, што стваралася стагоддзямі. І кожны раз беларусы сваёй працай упарта ўсё аднаўлялі нанава. Менавіта працавітасць заўсёды дапамагала беларусам спраўляцца з цяжкасцямі, якія перыядычна ўставалі на шляху гістарычнага развіцця.
Дзень народнага адзінства – маладое свята, але яно атрымала ў 2021 годзе толькі гістарычнае афармленне, а на самай справе –
свята з глыбокімі гістарычнымі каранямі, гістарычнымі традыцыямі і гістарычнай мудрасцю. Устанаўленне Дня народнага адзінства 17 верасня падкрэслівае самадастатковасць беларускай нацыі і дзяржаўнасці, даказвае сілу і правільнасць абранага шляху развіцця беларускага грамадства.
Еўдакія КУШАВАРАВА, загадчыца Пацава-Слабадскога ФАПа, дэпутат Мышкавіцкага сельскага Савета дэпутатаў па Казуліцкай выбарчай акрузе №10:
– Асабіста для мяне Дзень народнага адзінства асацыюецца з яднаннем жыхароў Беларусі ў імкненні да міру, стабільнасці, развіцця.
Дата 17 верасня падштурхоўвае задумацца аб па-сапраўднаму гераічных подзвігах папярэдніх пакаленняў беларусаў, аб тым, якую цану нашы продкі заплацілі за сучасную незалежнасць, спакой, надзеі на стваральную будучыню, якія пануюць зараз у краіне.
Як прадстаўніка галіны аховы здароўя мяне, вядома ж, хвалюе развіццё медыцыны. З 1992 года працую сельскім фельчарам і магу параўнаць, наколькі ўзрос узровень аказання меддапамогі вяскоўцам за гэты перыяд. Зараз фельчарска-акушэрскі пункт можна назваць мініпаліклінікай на вёсцы. Да прыкладу, на нашым ФАПе можна не толькі вымераць артэрыяльны ціск і атрымаць першую дапамогу ў перыяд сезонных захворванняў. Мы прадастаўляем наведвальнікам комплекс медыцынскіх паслуг, робім уколы, кардыяграму, праводзім першасныя абследванні на анказахворванні, гінекалагічныя абследванні, вымяраем ўнутрывочны ціск і іншае.
Я ўпэўнена, што медыцына і далей будзе ўдасканальвацца і пашыраць свае межы. Гэтаму з боку дзяржавы надаецца значная ўвага.
Таццяна МІХАЛАП, загадчык магазіна “Спадарожнік” райспажыўтаварыства:
– Дзень народнага адзінства нагадвае ўсім нам, што ад яднання ўсіх беларусаў залежыць
будучыня нашай краіны і яе эканамічнае развіццё. У Беларусі пражываюць людзі розных нацыянальнасцей, палітычных поглядаў і веравызнанняў, у нас агульная гісторыя, якую нам неабходна не толькі захаваць, але і перадаць наступным пакаленням.
Згуртаванасць, салідарнасць і паразуменне беларусаў, аб’яднаных адной гісторыяй, традыцыямі, культурай і агульным духам павагі і роўнасці, на мой погляд, гэтыя якасці заўсёды былі галоўнымі для нашай нацыі і такімі павінны заставацца. А мы, беларусы, хочам жыць у мірнай, незалежнай краіне, у якой свята шануюцца і захоўваюцца нацыянальныя каштоўнасці, сямейныя і культурныя традыцыі.
Чым больш мы будзем ведаць аб нашым мінулым, тым менш будзе спроб парушыць адзінства нашага народа. Калі мы будзем разам, ніхто не здолее парушыць наша мірнае і шчаслівае жыццё. Усё ў нашых руках, усё нам пад сілу…
