З добрымі вынікамі падышлі супрацоўнікі ЦБП № 709 ААТ «ААБ Беларусбанк» да свайго прафесійнага свята – практычна ўсе даведзеныя прагнозныя паказчыкі выкананы. Добра спрацавалі  дзякуючы напружанай і адказнай рабоце ўсіх структурных падраздзяленняў Цэнтра банкаўскіх паслуг, правільна наладжанай арганізацыі дзейнасці калектыву.

Кіруе ЦБП дырэктар Алена Лявіцкая. Маючы за плячыма вялікі вопыт работы ў дадзенай сферы, яна валодае ўсімі тонкасцямі банкаўскай справы.

«Беларусбанк» сёння – самая аўтарытэтная і надзейная фінансава­крэдытная ўстанова краіны з шырокім спектрам банкаўскіх прадуктаў і паслуг, якія накіраваны, у першую чаргу, на якаснае абслугоўванне кліентаў.

Па словах дырэктара, банк карыстаецца даверам жыхароў раёна, якія захоўваюць свае зберажэнні на яго рахунках. Скарыстаўшыся крэдытнай падтрымкай, сотні кіраўчан палепшылі свае жыллёвыя ўмовы, а таксама ажыццявілі значныя для сябе мары – атрымалі адукацыю, зрабілі буйную пакупку, наведалі іншыя краіны.

Кліентамі Цэнтра з’яўляюцца як фізічныя, так і юрыдычныя асобы, індывідуальныя прадпрымальнікі. ААТ «ААБ Беларусбанк» прапануе мноства розных паслуг, большую частку якіх аказвае і ЦБП №709. Спектр іх з году ў год пашыраецца.

Працуюць у ЦБП 18 чалавек. Тут удала спалучаюцца вопыт работнікаў са стажам і энтузіязм маладых спецыялістаў. Гэта згуртаваны калектыў прафесіяналаў, людзей, аддадзеных сваёй справе, гатовых з усёй адказнасцю вырашаць пастаўленыя перад імі задачы. З пашанай і павагай супрацоўнікі ЦБП ставяцца да ветэранаў калектыву.

Аляксандра КАЛІНІНА.

Фота Максіма МІКЕШЫНА.