Год мінулы – год наступны. Бліц-інтэрв’ю с жыхарамі Кіраўшчыны
Традыцыйна напярэдадні Новага года рэдакцыя праводзіць бліц-апытанне сярод жыхароў Кіраўшчыны наконт самых яскравых падзей, якія адбыліся ў іх жыцці ў адыходзячым годзе.
Аксана БРАГА, аператар машыннага даення кароў СГФ “Чыгірынка” РУП “Беларуснафта-Магілёўаблнафтапрадукт”:
– Адыходзячы год стаў для мяне напэўна адным з самых яркіх: у снежні бягучага года ў шэрагу іншых прадстаўнікоў нашай краіны я была ўдастоена высокай дзяржаўнай узнагароды – медаля “За працоўныя заслугі”. Урачыстае ўручэнне ўзнагарод у Палацы Рэспублікі правёў прэм’ер-міністр Беларусі Раман Галоўчанка.
Шчыра кажучы, уражанні ад мерапрыемства – незабыўныя. У нас была магчымасць прайсці па прыгожых пакоях Палаца Рэспублікі, затым адбылося ўрачыстае ўшанаванне прадстаўнікоў самых розных прафесій з усіх куткоў Беларусі.
Прыемна было пачуць адрасаваныя ў наш адрас словы прэм’ер-міністра аб тым, што мы заслужылі таго, каб пра нашы працоўныя дасягненні даведалася ўся краіна.
Лічу, што гэты медаль – агульная заслуга ўсяго нашага дружнага калектыву. Высокія надоі складаюцца з самых розных паказчыкаў: якасных кармоў, належнага догляду і лячэння рагуль і іншае. Шчыра кажучы, у сельгасфіліяле “Чыгірынка” нямала дастойных і добрасумленных працаўнікоў.
Спадзяюся, што надыходзячы год для нашай краіны, Кіраўшчыны, сельгасфіліяла, дзе я працую, стане годам новых дасягненняў, развіцця і высокіх вытворчых вынікаў. А самае галоўнае – няхай над нашай прыгожай краінай будзе мірнае неба, каб мы мелі магчымасць жыць і працаваць, гадаваць дзяцей і ўнукаў. Нашаму беларускаму народу многае па сілах, бо ён моцны, працалюбівы і добразычлівы.
Уладзіслаў ПЕТРУЛЕВІЧ, заатэхнік-селекцыянер ААТ “Рассвет імя К.П.Арлоўскага”, малады спецыяліст:
– 2022 год стаў адметным для мяне па той прычыне, што я працаўладкаваўся на сваё першае рабочае месца! У калектыве шчырую з ліпеня. Прафесію атрымаў падчас вучобы ў Віцебскай дзяржаўнай акадэміі ветэрынарнай медыцыны. У “Рассвеце” праходзіў вытворчую практыку, мяне зацікавілі ўмовы працы, стаўленне кіраўніцтва і калег да работы. Да таго ж, я родам з суседняга з Мышкавічамі горада Бабруйска і пра гэтую легендарную гаспадарку ведаю амаль з дзяцінства. Перад размеркаваннем, калі ўбачыў, што “Рассвет” уваходзіць у дзясятку лепшых гаспадарак у рэспубліцы, то адразу ж захацелася працаваць менавіта тут!
У мае прафесійныя абавязкі ўваходзіць кантроль за асемяненнем кароў і цялушак, за расцёламі, збіраю і апрацоўваю інфармацыю аб гэтых працэсах. Больш вопытныя калегі дапамагаюць. Не адмаўляе ў парадах намеснік начальніка райсельгасхарчу па жывёлагадоўлі Іван Грышчанка.
Жывёлагадоўля – гэта вельмі цікавая галіна, пакуль што ні ў сваім прафесійным выбары, ні ў першым працоўным месцы не расчараваўся! Гэтага ж жадаю ўсім маладым спецылістам! Ну, а жыхарам Кіраўшчыны – моцнага здароўя, дабрабыту і прафесійных поспехаў у новым годзе!
Вадзім БОКАЧ, ігрок нацыянальнай зборнай Беларусі па пляжным футболе
(з 2009 года), гуляючы трэнер ПФК “ЦАР” (Магілёў):
– 2022 год у спартыўным плане для мяне і маіх сяброў-футбалістаў склаўся дваяка. З аднаго боку, наша клубная каманда “ЦАР” (Цэнтр алімпійскага рэзерву), аснову якой складаюць кіраўскія футбалісты, бліскуча правяла гэты сезон, заваяваўшы ўсе тры галоўныя трафеі: мы сталі другі раз запар чэмпіёнамі краіны, трэці – уладальнікамі Кубка Беларусі, а напачатку сезона нарэшце выйгралі і Суперкубак. Каманда з Прыдняпроўскага краю на бягучы момант па праву лічыцца мацнейшай у краіне.
А вось што тычыцца нацыянальнай зборнай, гонар якой акрамя мяне абараняюць кіраўчане Арцемій Дрозд, Юрый Пятроўскі і Антон Акуліч, то тут склалася далёка не так, як хацелася б. І ў тым няма віны каманды, а справа ў незразумелых і недарэчных санкцыях, пад якія, як вядома, трапілі спартсмены Беларусі і Расіі. На жаль, сутыкнуліся з імі і пляжнікі абедзьвюх краін. У выніку нашы камнады “праляцелі” міма Еўралігі-2022, адборачных матчаў на Сусветныя гульні і на Еўрагульні 2023 года. Прычым, не дапусціўшы беларусаў і расіян да важнейшых турніраў, чыноўнікі “ад спорту” пазбавіліся двух істотных канкурэнтаў: Расія – чэмпіён свету 2021 года, Беларусь – віцэ-чэмпіён Еўропы…
На наступны год, безумоўна, ускладваем вялікія надзеі. У красавіку адбудзецца адбор на чэмпіянат свету-2023, а ў канцы года пройдзе і сам Мундыяль. А яшчэ чакаем ІІ гульні краін СНД – мы будзем выступаць адназначна, бо яны будуць праходзіць у Мінску. Вельмі верым, што здаровы розум усё ж возьме верх над палітычнымі амбіцыямі пэўных спартыўных (і не спартыўных) “дзеячаў”, і налетась наша зборная вернецца ў сусветны і еўрапейскі спорт. Прынамсі, самі спартсмены зробяць усё ад іх залежачае, каб вярнуцца ў спартыўную эліту і выступаць дастойна.
Вольга ЗАРКЕВІЧ, кіраўчанка:
– Для мяне і маіх родных адыходзячы год вызначыўся доўгачаканай і яркай падзеяй – нараджэннем любімай дачушкі і ўнучкі Варвары. Наша малышка з’явілася на свет напярэдадні дня нараджэння маёй матулі і стала для яе самым дарагім падарункам, бо ў яе пяцёра ўнукаў-хлопчыкаў, і вось з’явілася наша маленькая прынцэса.
Парадавала мяне яшчэ адна падзея – правядзенне рамонту ў кватэры. Зрабіла ўсё так, як марыла, і зараз з задавальненнем гляджу на рэзультат.
З верай у лепшае жыву ў чаканні надыходзячага года. Вельмі хочацца, каб ён быў пазітыўным, добрым і абавязкова мірным. Напэўна, многія пагадзяцца з тым, што нічога ў свеце не можа быць даражэй за здароўе родных і блізкіх людзей, за мірнае неба над галавой.
Павел ПЯТРУША, кіраўчанін, выпускнік-2022:
– Першая палова года была няпростай, бо я рыхтаваўся да здачы школьных экзаменаў і цэнтралізаванага тэсціравання. Пасля таго, як гэты этап жыцця застаўся ў мінулым, нарэшце змог адпачыць. Летам працаваў у студатрадзе, праводзіў час з сябрамі, займаўся любімымі справамі.
Зараз я вучуся ў Беларускім нацыянальным тэхнічным універсітэце на факультэце інфармацыйных тэхналогій і робататэхнікі, асвойваю спецыяльнасць “Праграмнае забеспячэнне інфармацыйных тэхналогій”. У мяне пачалося самастойнае дарослае жыццё. Знайшоў сабе шмат новых сяброў, рад, што лёгка ўліўся ў калектыў аднагрупнікаў. Пакуль што вучоба даецца цяжка, аднак упэўнены, далей будзе лепей! У цэлым, лічу, што 2022 год атрымаўся ўдалым.
Напачатку надыходзячага года планую паспяхова здаць першую сесію. Таму зараз шмат увагі надаю вучобе.
У новым годзе жадаю ўсім поспехаў і дабрабыту!