На такую тэму ў Жыліцкім сельгаскаледжы прайшла дыялогавая пляцоўка.
Удзельнікамі мерапрыемства сталі навучэнцы каледжа, якія на выбарах Прэзідэнта Рэспублікі Беларусь будуць галасаваць упершыню.

Сярод спікераў дыялогавай пляцоўкі былі галоўны спецыяліст аддзела ідэалагічнай работы і па справах моладзі райвыканкама Алена Шчэрбіч, член камісіі па пытаннях аграпрамысловага комплексу Маладзёжнага савета (парламента) пры Нацыянальным сходзе Рэспублікі Беларусь і старшыня Маладзёжнага парламента пры Кіраўскім раённым Савеце дэпутатаў Анастасія Кірылава, намеснік дырэктара ўстановы адукацыі Аксана Нагарнюкова і выкладчык гісторыі Яўген Вараб’ёў.
Тэма прэзідэнцкіх выбараў у Рэспубліцы Беларусь застаецца адной з самых актуальных для абмеркавання ў грамадстве. Бо ад выбару кожнага з нас залежаць важныя рашэнні, якія датычацца будучыні ўсёй краіны. Як падкрэсліла Алена Шчэрбіч, звяртаючыся да навучэнцаў, актыўны ўдзел маладых людзей у палітычным жыцці адыгрывае ключавую ролю ў фарміраванні грамадзянскай супольнасці. «Удзел у выбарах – гэта выказванне вашай актыўнай грамадзянскай пазіцыі. Ад вашага выбару залежыць, каму вы даверыце сваю будучыню», – звярнула ўвагу Алена Васільеўна. Яна таксама дадала, што моладзь – самая дынамічная частка грамадства і вызначае будучае развіццё дзяржавы.
Аксана Нагарнюкова падтрымала думку Алены Шчэрбіч, адзначыўшы, што выбары – гэта не проста права грамадзян, але і іх прамая адказнасць перад грамадствам, грама­дзянскі абавязак. Актыўнасць моладзі ў палітыцы і сацыяльнай сферы – гэта аснова для далейшага прагрэсу і стабільнага эканамічнага росту.
Навучэнцы паразважалі над пытаннямі важнасці галасавання, ролі Прэзідэнта ў рэалізацыі дзяржаўнай палітыкі і неабходнасці актыўнага ўдзелу маладога пакалення ў палітычным жыцці краіны.
Яўген Вараб’ёў расказаў аб станаўленні інстытута прэзідэнцтва ў Рэспубліцы Беларусь, Анастасія Кірылава азнаёміла з дзейнасцю Маладзёжнага парламента пры Кіраўскім раённым Савеце дэпутатаў.
Завяршылася сустрэча тэматычнай віктарынай, паводле вынікаў якой самыя актыўныя ўдзельнікі атрымалі памятныя сувеніры.
Дыялогавая пляцоўка стала важным крокам у павышэнні дасведчанасці навучэнцаў сельгаскаледжа аб значэнні выбараў і развіцці ў іх пачуцця адказнасці за будучыню сваёй дзяржавы.
Яўгенія БЯЛЬКО.
Фота аўтара.