У мінулыя выхадныя ў Беларусі панавалі моцныя маразы і вецер, у сувязі з гэтым быў аб’яўлены аранжавы ўзровень небяспекі. Усе экстраныя службы працавалі ва ўзмоцненым рэжыме. Дзякуючы добра наладжанай рабоце на тэрыторыі нашага раёна ніякіх надзвычайных сітуацый зарэгістравана не было.

Параўнальна спакойнымі выдаліся калядныя святы для супрацоўнікаў раённага аддзела па надзвычайных сітуацыях. Мабыць, прафілактычная работа прынесла свой плён: грамадзяне з разуменнем аднесліся да захавання правілаў пажарнай і ўласнай бяспекі.
Работнікі УКП “Жылкамгас” працавалі ў штатным рэжыме. Перабояў з ацяпленнем і водазабеспячэннем не было. Усе кацельні з запасам забяспечаны палівам, строга выконваліся графікі падачы цяпла ў кватэры грамадзян і адмі-ністрацыйныя будынкі арганізацый і ўстаноў.
Без здарэнняў прайшло дзяжурства ў работнікаў філіяла “Бабруйскія электрычныя сеткі” раёна электрасетак: перабояў з электразабеспячэннем не зафіксавана.
Напружана папрацаваць у мінулыя выхадныя давялося супрацоўнікам аддзялення ДАІ РАУС. Акрамя сваіх непасрэдных абавязкаў па забеспячэнні бяспекі дарожнага руху інспектары дапамагалі вадзіцелям, якія з-за моцных маразоў траплялі ў складаныя сітуацыі. Кожны аўтамабіль АДАІ дадаткова быў укамплектаваны тросамі для буксіроўкі аўтатранспарту і … гарачым чаем.

Як паведамілі ў аддзяленні ДАІ, некаторыя з вадзіцеляў, каму ўдалося завесці свой аўтамабіль падчас маразоў, да месца прызначэння так і не змаглі даехаць: у каго замярзала паліва, у іншых “падвёў” слабы зарад акумулятара. Супрацоўнікі ДАІ ў гэтых выпадках выступалі ў ролі выратавальнікаў: дапамагалі заводзіць аўтамабілі, буксіравалі іх, дастаўлялі грамадзян да месцаў, дзе можна было абагрэцца, частавалі гарачым чаем.
7 студзеня ў рэанімацыйнае аддзяленне райбальніцы была дастаўлена жанчына з дыягназам “агульнае пераахалоджванне”. Дадзенае здарэнне адбылося з-за таго, што ў пацярпеўшай з-за маючагася захворвання прама на вуліцы здарыўся прыступ, і яна пэўны час праляжала на снезе. У райбальніцы пацыентцы своечасова была аказана неабходная медыцынская дапамога і, як стала вядома, учора яна ўжо сябе добра адчувала і была выпісана дадому.
Яшчэ адна жанчына сама звярнулася ва ўстанову аховы здароўя з падазрэннем на абмаражэнне. Аднак пасля абследавання ўрачом было ўстаноўлена, што шпіталізацыя пацыентцы не патрэбна: лячэнне яна будзе праходзіць амбулаторна.
Падрыхтавала Людміла СЯМЁНАВА.