Зямля — найвышэйшая каштоўнасць дзяржавы. А таму за яе аховай і выкарыстаннем наладжаны пастаянны і надзейны кантроль, функцыі якога ўскладзены на землеўпадаркавальныя службы.
Сярод асноўных задач, якімі займаюцца землеўпарадкавальнікі, — рэалізацыя нарматыўна-прававых дакументаў дзяржаўнага рэгулявання зямельных адносін, устанаўленне межаў населеных пунктаў раёна, абнаўленне планава-картаграфічных карт, разгляд матэрыялаў па прадастаўленні зямельных участкаў і іншыя.
Напярэдадні прафесійнага свята мы сустрэліся з начальнікам землеўпарадкавальнай службы райвыканкама Марынай КРАЎЧАНКА і папрасілі расказаць аб асноўных напрамках дзейнасці службы:

— Мінулы год, які ў нашай краіне быў абвешчаны Годам культуры, меў дачынене і да дзейнасці землеўпарадкавальнай службы, бо значная ўвага была нададзена культуры земляробства і гаспадарскіх адносін да зямлі.
Дзяржаўны кантроль за аховай і рацыянальным выкарыстаннем земляў на тэрыторыі раёна мы ажыццяўляем пастаянна. Асаблівая ўвага надаецца мэтаваму выкарыстанню і своечасоваму асваенню зямельных участкаў, недапушчэнню самавольных захопаў зямлі, а таксама навядзенню парадку на зямлі і добраўпарадкаванню тэрыторый населеных пунктаў. Імкнемся да таго, каб знайсці дбайнага гаспадара на кожны кавалак пустуючай зямлі.
Калектыў наш невялікі — 4 спецыялісты. Для зручнасці сяльчан работнікі земслужбы замацаваны за кожным сельсаветам, яны рэгулярна выязджаюць у сельскія населеныя пункты раёна, вядуць прыём грамадзян па пытаннях, якія тычацца зямельных адносін.
У мінулым годзе нашай службай праведзена каля 1000 праверак захавання зямельнага заканадаўства, па выяўленых парушэннях выдадзена 563 прадпісанні, вынесена 56 пратаколаў і пастанаўленняў аб адміністрацыйных правапарушэннях. Агульная сума спагнанняў склала больш за 1000 рублёў.
Летась за самавольны захоп зямельнага ўчастка быў прыцягнуты да адказнасці адзін грамадзянін. Нярэдкасць — выкарыстанне зямельных участкаў не па прызначэнні: грама-дзяне атрымліваюць зямлю пад будаўніцтва, але так нічога і не робяць. Парушэннем з’яўляецца і нямэтавае выкарыстанне зямельнага ўчастка: атрымалі зямлю пад будаўніцтва дома, а на самой справе займаюцца там вырошчваннем агарод-ніны. Летась прынята 5 пастаноў па адміністрацыйных спагнаннях на грамадзян, якія парушылі патрабаванні аб звароце за дзяржаўнай рэгістрацыяй правоў на зямлю.
Значная ўвага сумесна з сельвыканкамамі надаецца рабоце па ўцягненні ў сельгасабарот невыкарыстоўваемых зямельных участкаў. Пад кантролем работнікаў сельскіх Саветаў дэпутатаў праводзіцца абкошванне пустазелля, выдаленне шматгадовых насаджэнняў і хмызняку, знос пустуючых дамоў. Так, летась у сельгасабарот быў уцягнуты 421 гектар невыкарыстоўваемых земляў. Мы не па-кідаем без увагі ні аднаго ўчастка зямлі, які не апрацоўваецца па розных прычынах. Наш агульны клопат — берагчы зямлю, прымнажаць яе багацце.
Падчас праведзенай летась інвентарызацыі зямельных участкаў у 5 садаводчых таварыствах было выяўлена і канфіскавана 1,8 га незапатрабаваных земляў.
Пасля зносу пусту-ючых безгаспадарных дамоў паўстае не менш вострае пытанне па выкарыстанні застаўшыхся прысядзібных участкаў. У гэтым накірунку нашай службай таксама праводзіцца значная работа. Так, невыкарыстоўваемыя зямельныя ўчасткі, якія магчыма ўвесці ў севазварот, перададзены сельскагаспадарчым арганізацыям раёна. Дзе гэта зрабіць немагчыма, для больш рацыянальнага выкарыстання земляў пераразмяркоўваем участкі паміж грама-дзянамі для вырошчвання агародніны ці будаўніцтва жылых дамоў.
Штомесячна на сайце райвыканкама размя-шчаецца інфармацыя аб наяўнасці свабодных зямельных участкаў, якія могуць быць прадастаўлены грамадзянам для будаўніцтва дамоў. Да слова, у нашым раёне заўсёды маюцца ў наяўнасці свабодныя ўчасткі для рознага мэтавага прызначэння.
Мяркую, многія са мной пагадзяцца, што вельмі прыемна, праязджаючы па некаторых вуліцах горада і сельскіх населеных пунктаў, бачыць прыгожыя і дагле-джаныя прысядзібныя ўчасткі, кветнікі з рознакаляровымі раслінамі, акуратныя газоны. Радуе, што многія разумеюць — толькі агульнымі намаганнямі мы зробім нашу малую радзіму, нашу Кіраўшчыну прыгожай і квітнеючай.
Размаўляла Людміла СЯМЁНАВА.